Khiangte Construction Ṭhazual GOSPEL: Nancy Zothanmawii'n hma a hruai leh

Khiangte Construction Ṭhazual Gospel chart tharah Nancy Zothanmawii'n hma a rawn hruai leh ta.

Chhangchhe nu a nih hnu pawha zai lam chhunzawm zel, Nancy hian tun hnaiah music video thar a siam nual a,a zaithiamin a zai nung a, ngaihthlak leh thlir a manhla ṭhin hle. No 1 a rawn nihpui, 'Thlarau thianghlim min chenchilhtu' tih hi Upa Sanglianthanga phuah a ni. Nancy hian 2014-a a album siamah he hla hi a lo telh tawh a,music video hi tunhnaiah a rawn siamthar leh a ni. Recording hi Music Plus Recording-ah tiin, music video hi Chiangtea Videography kutchhuak a ni.

A hla sak chungchanga Vanglaini zawhna chhangin Nancy chuan, "A hla thu hi ṭha ka tih vanga sa ka ni. A phuahtu Pu Sanglianthanga chungah lawmthu ka sawi takmeuh. A hlate hi mi zawng zawng sak a phal lo a, mahse ka dil chu min phalsak loh lai a nei lo, ka duh hi mi pe zat zat zel. A hlate hi a ṭhain a rau a, a nung bik hliah hliah zel," tiin phal taka a hla saktirtu chungah lawmthu a sawi.

Nghaktea Fanai pawhin hma a rawn sawn zel a, 'Ka duhsam' tih chu no. 2-ah a rawn kaipui thei ta. Lalhlumawii 'Khawpui Mawi' pawh no. 3-ah a rawn lang chho ta bawk. Tunlai gospel artist lar, Maruati leh Dr Zoa te pawh Top 5-ah an rawng inhlangkai.

Marshall Fka'n nun thar a zawhna hla a siam chu Top 6-ah a awm a, ani bakah Sailo Lalsangzuali, Sawmtea Chhangte, Seraphic Choir leh Angaihtei Hnialum-te chu chart-ah an lang bawk.