Lersia Play September Top Chart: Hralh chhuah hnem ber ‘Rawng Chawhpawlh’

Mizo film streaming app, Lersia Play aṭanga September thla chhunga film hralh hnem ber chu GreenRocketTV kutchhuak, 'Rawng Chawhpawlh' a ni.

'Rawng Chawhpawlh' hi GreenRocketTV-in an YouTube channel-a 'Chhungkaw Chhehchhawl' behchhana an siam a ni a, September 23 zanah Lersia Play-ah an dah chhuak chauh a ni. Thla tawp lama chhawp chhuah ni mah se, September thla chhunga film hralh hnem ber an ni thei nghal.

He film director hi Abarim Lalrammawia niin, a changtute hi GreenRocketTV chhungkua aṭangin Tommy Rosangliana, Zoparmawii, Lalduhawmi, Lalchhandami, Thang-biakzuala, Zorammawia te an inlan a, anni bakah Maruata Hnamte, Eddie Tochhawng, Maruata Rawite, Rosangpuii Ralte, Vanlalawmpuia leh Zomuansangi-te an inlan bawk. Film hlimawm tak phena zirtirna nei ṭha, Kristian ṭheuh si, rinna hrang vanga inmil lohna leh inṭhen hranna awm ṭhinte pho lan a ni.

'Dear Kim' chu film hralh hnem ber dawttu niin, Isaac Chawngthu leh Zuali Chhangte channa a ni a, 'Dear Kim' director hi Jonathan Thangeo niin, Amos Lalramchhana Fanai (Highland) produce a ni. Horror-comedy, 'Kaphranga Fatlum Awitea -The Ghost Hunter' chu film hralh hnem pathumna a ni a, Johan Lalhmunmawia (JC Motion Pictures) siam niin, film lama hriat hlawh - Esther Hadasi Ralte, Elvis Ngurchungnunga bakah YouTube lama mi lawm hlawh tak, Lalrozuala Chawngthu-te an chang. July 7-a tihchhuah, 'Pa Hausa' chu September-ah pawh film hralh hnem pangana a la ni pha. In-House Production kutchhuakah hian Papuia Pachuau leh Sangsangi, Joe Pachuau leh Sangpuia te an chang.

September thla chhunga Lersia Play aṭanga film hralh hnem zual 10 zingah hian Mimi, Mo Kawr, Archangkawm, Brother Zova leh Driver Kima te an lang bawk.