Box Office: 'Paw Patrol' sequel a chung berah awm

North American box office-ah kar liam taa film chhuak, thawm nei lian tak tak karah family animated movie, "PAW Patrol: The Mighty Movie" chu a chung berah a awm.

Canadian superhero comedy film hi theatre 3,989-ah tihchhuah niin, tlangzarh karah sum lak luh tura beisei aia tam, USD mtd 23 a la lut thei. Audience zingah 90% hi naupang leh an nu leh pate an ni.

2021-a tihchhuah, 'Paw Patrol : The Movie' chhunzawmna hi international lamah pawh a che ṭha nghal hle bawk. He film-a aw thawhtute hi Taraji P. Henson, Kristen Bell, Christian Convery, Brice Gonzalez, Mckenna Grace le Lil Rel Howery-te an ni a, Rotten Tomatoes chuan rating 6.3/10 a pe.

No. 2-ah tlangzarh thar tho, 'Saw X' langin US leh Canada-ah USD mtd 18 a la lut. A series zingah chuan review a hmu ṭha ber a, CinemaScore chuan B a pe. USD mtd 14 la luttu,Gareth Edwards-directed original sci-fi epic 'The Creator' chu pathumnaah awmin, newcomer tho 'The Blind' erawh chuan 'The Nun II' a lehpel pha lo a, paruknaah a awm. Kar hmasa lama champion, 'The Nun II' hian USD mtd 4.7 a la lak luh belh leh a ni. 'Barbie' pawh no. 10-ah a la inhamtang thei zel a, hetih lai hian "Expend4bles" chu a kar hnihnaah no. 2 aṭangin no. 9-ah a tla thla nghal a ni.