South Korean movie 'Parasite' a ropui Best Actor Joaquin Phoenix
Khawvelin a ngaih hlut, Academy of Motion Picture Arts and Sciences (AMPAS) buatsaih 92nd Academy Awards chu Pathianni zan (Kan ram huna nimin zing) khan Dolby Theatre, Hollywood, Los Angeles-ah sem a ni ta a, film ṭha tak tak karah South Korean movie 'Parasite' ropuina khum thei an awm lo.
Oscar award hi category 24-ah sem a ni a, US-ah chuan ABC-in a pechhuak a, a zawna a kum hnihna atan host awm loin programme hi kalpui a ni.
Parasite chuan award la hnem berin pali a la a, 1917 chuan dawtin award pathum a la ve bawk. Ford v Ferrari, Joker leh Once Upon a Time in Hollywood-te chuan award pahnih ṭheuh an la thung.
Chan loh khanah Parasite
South Korean film Parasite hian mi tam tak a barakhaih ngeiin a rinawm. Award pali la theiin Oscar 2020-a award la hnem ber a nih piah lamah a award dawnte hi award ngaihhlut ber berte zinga mi a ni hlawm.
Best Picture, Best Director, Best Original Screenplay leh Best International Feature Film category-ah te award a la a, hollywood movie ropui tak tak ngam lotu a ngah hle.
English hmang lo ramdang film zinga Best Picture award la thei hmasa ber a ni bawk a, history a siam a ni. South Korean film zinga Foreign Language Film, International Feature Film tia kumin aṭanga a hming thlak tak category-a award la thei hmasa ber a ni bawk.
Hollywood movie lam ve thung
Indopui I-na hunlai behchhana siam 1917 pawh rin ang ngeiin a che ṭha a, Parasite erawh a tluk thei ta lo a ni. Best Cinematography, Best Sound Mixing leh Best Visual Effects a dawng a ni.
Nomination hmu hnem ber Joker erawh beisei angin a che ṭha lo thung a, Best Actor leh Best Original Score a dawng a ni. Nomination 11 lai hmu mah se award pahnih chiah a hum haw thei a, Joker role hnehsawh taka chantu Joaquin Phoenix hnena Best Actor award hlan a ni erawh mi tam tak rinlawk sa a ni a, Renée Zellweger hnenah Best Actress hlan a ni bawk.
Eminem-a'n mipui a barakhaih leh ta
A album hnuhnung pahnih a tlangzarh dawn khan a puangzar lawk lo a, khawvel a barakhaih tawh. Oscar award semnaah pawh mipui barakhaih lehin puangzar lawk loin 2002-a tihchhuah tawh, a film channa 8 Mile track Lose Yourself a rawn perform thut a, mipuiin mak an ti hle.
Eminem rawn inlan thut chuan Award semnaa kalkhawmte a barakhaih a, milar fuankhawnte hmel chu a hmuhnawm letling a, entertainment media-te'n sawi nuam an ti hle. Billie Eilish mak ti hmel ringawt pawh retweet a tam hle a ni. A tirah mak ti mah se a rap chu an zawm leh nghal duh duh thung.
8 Mile film hian 2003 khan Oscar award a dawng tawh nghe nghe.