Justin Bieber A hlawhtlinna a chhinchhiahtlak

Billboard album chart ni lo, single chart lamah Justin Bieber a ropui hle a, kum sawm liam taa Justin Timberlake-a hnuah mipa zinga hlawhtling ber a ni.

Billboard Hot 100 chart-a Justin Bieber-a hla 'Love Yourself' chu pakhatnaah a rawn chho a, ama hla tho 'Sorry' a rawn luahlan. Mahni hla, mahni hla dang thoin pakhatna dinhmuna a rawn luahlan ang chi hi Billboard chanchinah a tam lo hle a, mi 12 chauh an la awm.

Kar hmasa hmasa leh khan Billboard Hot 100-ah hian Justin Bieber-a hla 'Sorry' pakhatnaah a awm a, 'Love Yourself' hian a rawn lehthal a ni. Hetianga mahni hla thoin a lehthal leh hnuhnung ber chu nikuma The Weeknd hla kha a ni; 'The Hills' chuan 'Can't Feel My Face' chu a rawn luahlan leh. Kum 2014 khan Taylor Swift chu a hla 'Blank Space' chuan 'Shake it off' a rawn khum chho tawh bawk.

Justin Bieber-a hlawhtlinna langsar tak chu album pakhat hla pathumten Billboard Hot 100-a pakhatna an hauh thei hi a ni. Hetianga album pakhata hla mal pathum ngawtin pakhatna an hauh theihna album hi a tam lo hle a, kum sawm liam ta khan Justin Timberlake chuan hetiang hlawhtlinna hi a lo chang tawh a, hemi hnua mipa zinga hlawhtling leh hmasa ber chu Justin Bieber hi a ni.

Kum sawm liam ta khan Justin Timberlake chuan a album 'Futuresex/ Lovesounds' album hmangin ropuina a lo chang tawh. He album-a hla - Sexy Back, T.I. nena an sak My Love leh "What Goes Around...Comes Around" chuan Billboard Hot 100-ah pakhatna an lo hauh tawh. Purpose album aṭang hian Bieber-a hla Love Yourself, Sorry leh What Do You Mean? ten pakhatna an hauh thei. Hetiang dinhmuna ding thei, Justin Bieber-a hma chiaha mi chu Taylor Swift a ni. Shake it off, Blank Space leh Bad Blood hlate hmangin Billboard single chart-ah hian pakhatna a lo hauh ve tawh bawk.