DJ Lalvenhimi Ṭhian rinawm a nei nge a rukin star a nei zawk?

'Lungdumtu' original soundtrack hnuah DJ Lalvenhimi chuan music video thar a peih leh ṭep tawh a, kar leh khi chuan kan hmuh theih tawh beisei phawt ang. He music video hi a 'cial dawn a, a hmuhnawm a rinawm.

DJ-i music video thar tur hi 'Ṭhian rinawm' tih a ni a, tunlai hla phuahtu lar leh, ṭhalaite duhzawng tak mai phuah chhuak thiam Lal K. Sailo hla phuah a ni.

A hla, ama single-a a tihchhuah pangngai hoah kha chuan duh loh zawng tina hmel tak kha a ni ṭhin a, mahse tun ṭuma DJ-i hla thar tur erawh a dan a dang viau dawn. "Ka hla hmasate nen a inang lo hle dawn a, mi duh lohna leh hnarna lam hla a ni dawn lo a, tuna mi thung hi chu mi duhna hla a ni thung ang. Mi a va star-na hla tur chi deuh a ni....a...ka hla dangte nen chuan a dang hlak ang," a ti.

"A genre hi Hip-hop lam a ni a, reggae tlem a tel bawk dawn. Theihtawp chhuaha kan siam a ni a, a ṭha thei ang ber tura ngaihin kan siam a, kan beisei pawh a sang a, mahse entu leh ngaihthlatute mit a tlung ang em tih erawh ka hre lo. Keimah bik chuan ka chhuangin ka duh ang taka siam a ni bawk a, a hlutawm hle dawnin ka hria," a ti. Costume vel pawh an uluk a, fairy costume lam a music video thar turah hian kan hmu ang. "Ka hmehbel ber chu Fairytale a ni," a ti.

Video an uluk a, Leitlang Pictures kutchhuak a ni a, a costume hi Rosy Boutique, Lalbuaia Shopping Complex chuan a tumsak a, DJ-i hian thlate a nei dawn! Wardrobe hi Achhani Innovative Dresses a ni a, Jey Vee Jongte chuan make-up lam a tihsak. Hengte bakah hian a thawmhnaw leh amah puitu hrang hrang, Millenium Centre-a Options neitute, William Paris te chungah a lawm hle. Video hi Lungleia an shot a ni.

Kumin hian album tihchhuah ngei tumin DJ-i hian hma a la mek a, mahse a duh ang erawh chuan hna a thawk chak thei lo. "Hla pawh eng emaw zat ka nei tawh a, hma ka la chho mek a, mahse ka duh angin ka ti chak thei lo. Zin chhuahna tur ka nei reng a, mite duhsakna leh khawngaihna azarah zaina tur hmun hrang hrangah ka nei reng a, ka buai ang reng a, hma ka la chak tawk thei lo. Mahse kuminah erawh chuan tihchhuah ngei ka tum," a ti. Hla a tihchhuah tawhho a telh dawn nge dawn lo tih zawhna chu, "Telh chu ka tum a, mahse bonus track angin a ni ang. A hmaa mi ang chiah chiah erawh chu a ni lo ang a, a version tlema danglam deuh hlekin a ni ang," a ti.