Earth, Wind & Fire dintu White kan chan ta

American band lar ṭhin Earth, Wind and Fire dintu zinga mi leh zaipu ni bawk Maurice White chu kum 74 mi niin, Nilaini khan Los Angeles-a a inah a boral.

White hi kum 1992 aṭang khan Parkinson disease vangin a buai tawh a ni.

Kum 1969 khan Verdine nen "Earth, Wind and Fire" group an din a, album maktaduai 90 zet an hralh. Grammy Awards vawi ruk an dawng a, kum 2000 khan an band hi Rock and Roll Hall of Fame-ah lakluh an ni nghe nghe. Kum 2010 khan amah White bik hi Songwriters Hall of Fame ah lakluh a ni leh bawk.

An hla lar zualpui te chu- That's The Way of The World, September, Boogie Wonderland, Shining Star leh After the Love has Gone tihte an ni. Tun thla tawp lama Grammy award sem turah Run-DMC leh Herbie Hancock te nen "lifetime achievement award" dawng tura beisei an ni.