Ngaihven hlawh ‘Ambush’ tlangzarh dawn ta
Mizo film chhuak tur zinga ngaihven hlawh, Leitlang Pictures Production kutchhuak 'Ambush (A War Story)' chu zanin dar 8 hian Mizoram University Auditorium-ah tlangzarh a ni dawn ta a, premier show neih a ni nghal ang.
October 7, Inrinni zan hian Saikuti Hall, Lunglei-ah premier show hi neih a ni leh ang a, kar leh Thawhlehni aṭangin show system-in kalpui ṭan a ni ang. Show system hian an kalpui phawt dawn a, book-tu an tam avangin streaming app lama dah chhuah hun tur hi an la sawi mai thei lo tih 'Ambush' director Mapuia Chongthu chuan Vanglaini a hrilh.
'Ambush' hi 1966 Mizoram independent movement behchhana siam a ni a, Mizo film budget sang ber niin, cheng nuai sawmthum vel an seng. Mihring pawh 200 chuang an lang. He film hi May thla tir aṭanga siamin, hmun hrang hrangah shooting hi neih a ni. Research leh data lak khawm aṭanga Mizote'n zalenna an sual dan leh, mipuiin an tawrh dan behchhana siam a nih rualin, a tihmuhnawm turin character, scene leh dialogue-te duan a ni.
Director Mapuia Chongthu, Leitlang Pictures hi Mizo film industry chawikangtu pawimawh a ni a, Mizorama film siamtu zingah chuan hriat hlawh leh chungnung bera ngaih a ni. 'Leitlang Pictures kutchhuak a chhe ngai lo', tih a ni hial ṭhin. Script writer Dr Zarzosanga leh screenplay Nuna Hrahsel te an ni.
A changtute pawh lemchan lama mikhual lo tak an ni hlawm. Sangtea Chhangte chu Thartea a rawn ni dawn a, Marilyn Chhanchhani chu Zualtei niin, Major Lalngura lemah Sena Ngente, Gilbert Colney chu Captain Zohmangaiha, VCP-ah R. Lalnuntluanga leh Indian Army commanding officer-ah Eddie Tochhawng-te an chang. English leh Mizo sub-title dah a ni dawn a, Indian Army lam an lang tam a, sipaite hian Hindi an hman avangin Mizo sub-title hi dah tel a ni.
Mapuia Chongthu chuan he film hi national OTT lamah dah theih dan kawng an zawng nasa tih a sawi a, mahse, independent movement lam a nih avangin a subject a sensitive a, Indian Army lam mawi lo taka lannate a lo nih avangin an biak tawhte chuan an dah ngam lo tih a sawi. Biak hmabak la nei tho mah se, hei pawh hi a beiseiawm lem loh niin Vanglaini a hrilh.