Instagram leh Facebook tan monthly fee siam rawt

Meta chuan Instagram leh Facebook, adverstisement awm loa hmang duh tan monthly fee siam a rawt. Mahse he rawtna hi Europe tan chauh tih a la ni rih a, India leh Asia lam sawi lan a la ni ve lo.

Rawtna an siamah chuan Europe-a user-te tan ads awm loa heng platform hmang duh chuan thla tin euro 13 vel chawi a ngai dawn a ni. He ruahmanna thar chungchang hi Meta hian Ireland privacy regulator, Brussel-a digital competition authority leh European Union privacy regulator-te pawh an hriattir tawh. Hei hi kalpui a nih hunah user-te chuan thla tina pawisa chawi a ads awm loa khawih nge, pawisa chawi loin personalised advertisement awmna khawih an duh zawk an thlang thei ang.