No 1-ah R. Lalruatsangi 'Chanchinṭha hril'

Ṭhazual Fakna Chart-ah R. Lalruatsangi 'Chanchinṭha hril' pakhatna a ni a, Ruthi CVL Muanpuii 'Lalpa nang hnaih zel hi' chu pahnihna niin Angaihtei Hnialum 'Ka nun I tan ka pe' chu pathumna a ni bawk.

R. Lalruatsangi hla 'Chan­chin­­ṭha hril' hi John VL Rem­ruata phuah a ni a, nikum September thlaah khan MDM YouTube channel-ah dah a ni tawh. Ṭhazual fakna chart-ah hian a mikhual tawh lo hle a, tihchhuah a nih hnu lawk aṭang khan chart-ah hian a lang nghal a, nikum kum tawp lamah khan Top 3-ahte pawh a inhlangkai tawh hial bawk.

Tlemin han hnungtawlh ve leh deuh mah se hma a rawn sawn zel a, chart hmasaah khan pahnihnaah rawn invawrhin tunah chuan pakhatna dinhmun a rawn luah thei ta a ni. 

He hlaa music mawi tak mai hi Johny Tsa kut chhuak a ni a, guitar hi Ephraim-a kut chhuak a ni thung. Music video hmuhnawm tak hi RFX video production siam a ni bawk.

Ruthi CVL Muanpuii 'Lalpa nang hnaih zel hi' chu ṭum hnih ngawt chart-ah pakhatna a nih hnuah R. Lalruatsangi'n a rawn nek chhuak ta a, pahnihnaah a awm ve ta thung a ni.

Angaihteii Hnialum 'Ka nun i tan ka pe' chu pariatna aṭangin pathumnaah a rawn invawrh dawrh bawk a, ani hian a dinhmun a rawn sawh nghet chak hle.

Ṭhazual fakna chart boruak a 'hot' a, artist ṭha tak tak an intlar thla duat. Grace Lalchhanhimi 'A kiangah' chu palina a ni a,  Fiona Lalmal­sawmi 'Kristaa lawmna' chu pa­ngana a ni bawk.

Mirian Lalnun­diki 'Lawma Hla' chu parukna a ni a, pasarihnaah hian One In Christ an awm ve thung a, Manuni 'Eng ka hmu ta' chu pariatna a ni ve bawk, C. Lalenkawli 'Aw i hmangaihna' chu pakuana niin Mawitea'n 'Chibai ka buk che' hmangin Top 10 a khar a ni.