Chengrang leh Ngenmu Season 3 zawh fel a ni ta

Mizoram Investment Reality Show hmasa ber, Tharthilthlentu (TiLi) leh Zonet Cable TV ṭangkawpin an buatsaih, Chengrang leh Ngenmu Show Season 3 Grand Finale live show chu Zirtawpni liam ta zan khan Dawrpui Multipurpose-ah neih a ni. He live show-ah hian LESDE Dept. leh Jal Jeevan Mission (JJM) te main sponsor an ni.

Grand Finale live show-ah hian startup pali Suzzane Delight, Peipung Edu Tech Pvt. Ltd., Fungki leh Lamkal Pvt. Ltd. te'n an startup an dinpui. Investor pahnih Lalrinchhana Tochhawng, Dealer Principal, Lawma Enfield leh Andrew Hmingmawizuala, India Lead, Telstra Enterprise Marketing ṭhuin, curator-ah Mark Lalduhsaka, Chairman ISMC - TiLi Incubator, a ṭhu bawk. Investor-te hian startup 4 pitch zing aṭangin startup 3-ah investment an siam.

Andrew leh Suzzane Delight te chuan Rs 5 Lakhs for 8% share deal an siam a, Lalrinchhana leh Lamkal Pvt. Ltd. te chuan Rs 5 Lakhs 8.5% an siam thung. Investor-te hian an pahnihin Peipung Edu. Tech ah invest ve ve bawkin, Lalrinchhana'n 8% + 1% advisory share leh Andrewa'n 1% advisory share a la bawk.

TiLi Incubator Chairman & CEO, LTL Fela chuan TiLi tum pawimawh tak, Mizoram chhung chauh ni lo, Mizoram pawn, khawvel huap pawha Mizo thlenpui tum a nih thu a sawi a, startup india hnuaia official incubator an nihna a sawi zau bawk. People’s Choice thlanna huaihawt bawkin, mipuite duh ber hi ADUMAVAR app kal tlangin show chhung hian live polling in thlan a ni a, Peipung Edu. Tech Pvt. Ltd. te thlan an ni.