Blackpink-in Selena Gomez an thawhpui dawn

Kar khat dawn thu lengvel a awm hnuah a chiang ta! Selena Gomez chuan twitter kaltlangin Blackpink a thawhpui tih tichiangin August 28 hian an hla thar kan hmu dawn a nih hmel.

Thawhlehni khan Instagram leh Twitter lamah hemi chungchang hi tarlangin,"Blackpink nen August 28-ah hla thar kan tichhuak dawn a, ka phur tawh hle a ni," tiin a sawi a, hemi inziahna poster hi a tarlang tel bawk.

Blackpink hian an 'area' an zauh zel a, khawthlang lam zaithiam eng emaw zat an zaipui tawh a, tunah Selena Gomez an thawhpui leh tur pawh hi an fan-te tan chuan a phurawm tawh hlein a rinawm. Hun eng emaw chen hla thar an neih loh hnuah June thla tawpah khan music video thar 'How You Like That' an rawn tichhuak a, record an siam nghal mawlh mawlh mai a nih kha. Tun ṭuma Selena hoa an hla thar tihchhuah tur pawh hi beisei a sang leh viau a, YouTube record an rawn siam leh nghal mai thei a ni.

'How You Like That' hi YouTube-ah thlirtu maktaduai 400 chuang an awm tawh a, kumin October 2 hian an studio album pahnihna tihchhuah an tum a ni. Jisoo, Jennie, Rosé leh Lisa-te bula Selena a ding ve tur hi hmuh a chakawm tawh hle. Selena phur tluk zet hian Blackpink lam pawh hian phurawm an ti tawh niin a lang a, YG Entertainment thuchhuah Koreaboo-in a tarlanah chuan, "Heng artist pahnih, hun rei tak chhung inngaisang tawn tawhte hian he an thawhdunna hmang hian an duhthusam an tipuitling a ni. Blackpink chuan Selena chungah he album-a a tel ve avang hian lawmthu an sawi a, hla tih­chhuah hun tur pawh an nghakhlel tawh hle," tiin an ziak.