Khiangte Construction Ṭhazual Lengzem: Manuna'n 'Ka ta I ni' tiin hma a hruai

Khiangte Construction Ṭhazual Lengzem chart tharah Manuna chuan 'Ka ta I ni' tih hmangin hma a rawn hruai.

Mizo lengzem mipa artist ṭha ber zinga mi, Manuna hian a khat tawkin hla lar tak rawn neiin chart-ah pawh a lanpui thei zel a ni. 'Ka ta I ni' tih pawh chart-ah hun eng emaw chen a lanpui hnuin no. 1-ah a rawn kaipui ta a ni. He hla hi August 27-a a tihchhuah kha niin, ama phuah a ni. Music leh recording hi Rpa Ralte kutchhuak niin, a video hi Kingpin's Production siamsak a ni thung.

Ṭhalaite lawm leh duh rawn, Siampuii Ralte pawhin a dinhmun a rawn siam ṭha zel a, J&J hla a cover 'Nang ngei hi' tih chu pahnihna a rawn nihpui thei ta. A zaithiamzia sawi nawn ngai lo, Mizo Idol 2022 Hmangaihi'n intihsiak zawh hnua a music video siam hmasa ber, 'Friendzone' chu pathumnaah a rawn chho. Mizo Idol 2022 Top 10 zinga mi, Eddie Pachuau 'I tello hringnun' leh Chama Thangluah 'Ka lam Jacket' chu Top 5-ah an lang bawk.

Ṭhazual Lengzem Top 10-ah hian Kimkimi pawh la lang chhunzawmin hma a rawn sawn zel a, ani bakah mi thar pali rawn langin, chungte chu Keimah Senes X Tlangval Tlumtea X Lil Me, Mary Dawngi, Siamsiami Pachuau leh Michelle Varte te an ni.