Box Office : "The Exorcist: Believer" a hrang na

US box office-ah The Exorcist sixth installment, "The Exorcist : Believer" a rawn hrang na hle a, tlangzarh karah US mtd 27.2 la lutin no. 1 a rawn hauh.

Horror movie tihchhuah thar hian box office-ah a chung ber rawn hauh mah se, sum lak luh tura beisei zat erawh a pha lo thung. R-rated movie hi tlangzarh karah USD mtd 35 vel la lut thei turin an chhut a ni.

'The Exorcist' original hi kum 1973-a tihchhuah niin, 'The Exorcist : Believer' hmaa a sequel hnuhnung ber chu kum 19 liam ta khan tihchhuah a ni bawk. Sixth installment hian box office lamah bul ṭan ṭha hle mah se, Rotten Tomatoes-ah critics review a ṭha lo, 23% chiah a hmu pha a, audience score lamah pawh a che ṭha lo.

No. 2-ah Paramount "PAW Patrol: The Mighty Movie" awmin, a kar hnihnaah hian theatre 4,027-ah tihchhuah a ni a, USD mtd 11.7 a lak luh belh leh. Animated sequel hian North America-ah USD mtd 38.3 leh international-ah USD mtd 48.2 a la lut tawh a ni.

USD mtd 8.15 la luttu, "Saw X" chu pathumnaah awmin, mihring leh AI indona chungchang, "The Creator" chuan USD mtd 6.1 la lutin palinaah a tla thla. Top 5 hi Phil Robertson chanchin tarlanna, "The Blind" chuan a rawn khar a, USD mtd 3.1 a la lut.

Tun ṭum box office-ah hian July thlaa tlangzarh, kumina film tihchhuah tawh zinga thawm nei lian ber, "Barbie" film chu tihchhuah a nih aṭangin a ṭum khatna atan Top 10 zingah a lang pha ta lo.