Gal Gadot-i'n Israel thlawp turin ngen

Israeli actress 'Wonder Woman' Gal Gadot chuan Palestinian militant group, Hamas leh Israel-te inbeihna thlengah Israel a thlawp thu leh, midangte pawh thlawp tura a ngenna a tarlang.

Gal Gadot hian a Instagram-ah firfiaka chetna rapthlak tak thleng chu thlir liam mai mai tur a ni lo tiin, Israel chuan beih a tawk mek a, midangte puih leh thlawpna a mamawh a ni, a ti.

Mi lar dang eng emaw zat pawhin Israel an thlawpna thu hi an post bawk. Jerusalem-a piang, actress Natalie Portman chuan Israel mipuite chunga thil thleng chuan a rilru a tina hle tih sawiin naupang, hmeichhia leh kum upa zawk chu thah an ni a, an chenna in aṭanga ruk bo an ni bawk a ni, a ti. "Rawng taka chetna thleng hian min ṭhawng hle. He pawikhawihna thleng tuartute tan ka ṭawngtai a ni," tiin a sawi.

Madonna pawhin Hamas-te'n Israel beihna tura rocket an kah chhuah video leh, Israel kawtthlera mitthi ruang awmte thlalak chu a tarlang a, Israel a lainat thu leh, Hamas-te thiltih tuartute tan a ṭawngtaisak thu a sawi.

Andy Cohen, Mark Hamill, Kris Jenner, Kylie Jenner, Sarah Silverman leh Debra Messing-te pawhin Israel thlawpna thu hi an post a, mahse, Kylie Jenner chuan a hnu lawkah a thu post hi a delete leh nghal. Kylie hi a ṭhian ṭhate, Gigi Hadid leh Bella Hadid chu Palestinian thlah an ni a, hemi kara Israel thlawpna thu a lo post hi online user lamin an sawisel zui nasa hle a, a thu post hnuah hian Instagram-ah follower maktaduai 1 vel a hloh tawh a ni.