EU-in X-a thu dik lo post paih turin hriattir

European Union chuan social media company, X (Twitter tia hriat ṭhin) neitu Elon Musk hnenah tunlaia Israel leh Palestinian militant group, Hamas-te indo mek chungchanga thu dik tawk lo post-te paih vek turin a hriattir. Thawhlehni zan khan Musk hnenah lehkha hi thawnin, darkar 24 chhunga chhanna pe turin an ti bawk.

Researcher, organisation leh group hrang hrangte chuan X-ah hian indona thleng mek chungchanga thu dik lo, midang rilru hruai kawi thei eng emaw zat post a nih thu an sawi hnuah, European commissioner for internal market, Thierry Breton chuan Musk hi lehkha a thawn a ni.

EU chuan hriattirna an pek hi an zawm loh chuan, X hi sum tak tak chawitir theih a ni dawn tih sawiin, company-in kum khata a sum lak luh aṭanga 6% hu a chawi thei dawn a ni.

Nikum October thla khan Elon Musk hian Twitter hi leiin, a hnuah a hming hi X tiin a thlak. A lei hnuah thawktu tam tak banin, policy pawh a thlak danglam nasa hle. Researcher-te'n data tool an hman theih pawh a tihtawp avangin, automatic-a keyword, hashtag leh information an chhuina pawh a awm thei tawh lo a, manual-in link hrang hrangte zir chian vek a ngaih tak avangin information dik lo theh darh pawh a tam phah niin an sawi.