Spotify-in India-a free user tan policy thlak

Music streaming service, Spotify chuan India rama free user-te tan policy a thlak.

India-a free Spotify user-te chuan hla an play-te chu a indawta an duh dan emaw, repeat emaw an duh lai bik va rewind kha an ti thei tawh dawn lo. He feature hi Premium subscriber chauhin an ti thei tawh ang.

Hemi rual hian free user-te chuan an artist duh ber, album, playlist-te an la ngaithla chhunzawm thei dawn tho a, song recommendation pawh an la dawng ang. Mahse free user-te tan default listening mode-ah Smart Shuffle ah ni tawhin, hei hi tihtawp theih a ni lo ang. Smart Shuffle hian user-in an hla ngaihthlak leh playlist behchhanin song suggestion hi a rawn siam dawn a ni.

Spotify hian Indian rama free user-te ngaihnathiamna hi kum 2019 aṭang khan a kalpui ṭan a, mahse Indian market chu a mature tawhah a ngaih avangin a rawn thlak ta a ni.

April thlaa Redseer in zirchianna a neihah, Spotify hi India rama music streaming platform zinga hman nasat ber a ni. Khawvel pum huapin India chu Spotify hmang nasa ram pangana a ni pha a, kumin kumtir lam khan Spotify hmangtu hi mtd 50 an tling tawh. Mahse a hmangtu tam ber hian free ad-supported plan an hmang thung.

India rama premium plan an siam hi ni khatah Rs 7-in a inṭan , hemi hmang hian ad-free music a ngaihthlak theih bakah, mobile device pakhat aṭangin hla 30 thleng a download theih. Thla khat atan Rs 119-a subcribe theih ni bawkin, device 5 aṭangin hla 10,000 thleng a download theih a ni. Hei bakah hian duo plan, thla khata Rs 140 leh familiy plan, thla khata Rs 179 man a awm bawk.