Hollywood actor leh studio-te la inrem thei lo

Hollywood actor intelkhawm, Screen Actors Guild-American Federation of Television and Radio Artists ( SAG-AFTRA) leh Alliance of Motion Picture and Television Producers (AMPTP)-ten inremna kawng zawnga inbiakna an neih chu a hlawhchham a, hei vang hian actor-te hian nawrh chhunzawm zel an la tum.

SAG-AFTRA -in show hrang hranga streaming revenue insem tura an rawtna chu AMPTP lam hian an pawm thei lo a, hei hi an pawm a nih chuan kumtin USD mtd 800 vel an hloh dawn niin an sawi. Hei bakah SAG-AFTRA minimum rate 11%-ah tihsan an rawtna chu AMPTP hian Writers Guild of America (WGA) leh Driectors Guild of America nena inremna an lo siam tawh ang, 5% anga kalpui an duh bawk.

AMPTP chuan inbiakna ṭum eng emaw zat nei mah se, pawl pahnihte inkara inhriatthiam lohna chu a lian em a, inbiakna pawh chuan rah ṭha a chhuah thei lo niin an tarlang.

Hetih lai hian actor-te chuan studio lam chu 'bully tactics' hmangah an puh thung a, an thil rawtte chu ngaihtuah loin an hnar nghal a ni, an ti. Hei vang hian an member-te chu nawrh chhunzawm zel turin a ti a ni.