Liandailova Chhangte Zoramin kan thlah liam ta

Mizo zaithiam, a hunlaia Zoram zaithiam lar berte zinga mi, tun thlenga hriat hlawh, Liandailova Chhangte chu Inrinni zing dar 4:30 khan Civil Hospital-ah a thi a, hemi ni vek, chawhnu dar 1 khan a chenna in, Chaltlang Dawrkawnah vui liam a ni.

Liandailova Chhangte hi Vanlalvena leh Lalṭhuami te fa pasarih zinga pathumna niin, kum 1958, November 22 khan a piang a, an unau hi paruk an ni. Chaltlangah HSLC thleng a zir a, Aizawl College-a a zir laiin Economic and Statistics Dept-ah a lut ta a, a hnuah AH&Vety-ah awmin, hetah hian a thih ni thlengin a thawk ta a ni.

Zai leh rimawi lamah a tui hle ṭhin a, College a kal lai, kum 1976 khan fam ta, Joseph Zokunga te nen, hetih hunlaia band lar tak The Messengers Band an din a; Joseph Zokunga, Hnema (Hrangchhuana Pharmacy), Ngurbiakthanga H/o Vanlalruati leh Laltlanchhungi Pachuau te nen an lo zaiho tawh ṭhin. Hemi kum vek hian musical drama Down To Earth tih chu mipui hmuhah thiam takin an chang a, kum 1977-ah Prodigal Son tih chang lehin mipuiin an hlut a, a hunlai chuan drama lar tak a ni. He drama-ah hian Liandailova Chhangte hi fapa tlan bo lemah a chang nghe nghe.

Kum, 1977 khan All India Radio-ah hla a thun ṭan a, AIR-a a hla thun - 'Phengphe Nunnem', 'Nunhlui liam hnu' leh 'Tawnmang mawl an chang zo ta' tihte chu a lar hle a, sak zui pawh a hlawh viau. A audio album hmasa ber chu kum 1980 khan a tichhuak a, he album-ah hian tun thlenga hla lar leh sak hlawh fo ni ta 'Zan lalnu', 'I her dun ang' leh 'Chung muvanlai' te pawh a tel a ni. Lengzem Vol-II album a tichhuak leh a, hemi hnu hian gospel album a siam zui leh bawk. A album-a a hla, lengzem leh gospel album-a mite hi a hunlaia sak hlawh leh lar an ni a, chung zingah chuan 'Duhlai,' 'Chung muvanlai,' 'Kraws pangpar,' 'Zan lalnu,' 'I her dun ang,' 'Suihlunglentu,' 'Bahsamseihniangi' leh 'Min hrilh rawn zaninah ngei' tih te chu lar zual leh sak hlawh zualte an ni. Album pali lai a siam hman a, All India Radio-ah hian hla 70 chuang thun tawhin, B High Grade artist a ni bawk.

Kum 2004 khan a leiah b‚wk a awm a, a hnuah Vellore-ah zaiin, kum 2015 February khan Aizawlah a rawn let leh a, treatment pawh lak chhoh zui niin, a taksa pawh a pangngai chho viauin a lang. Mahse a natna vangte pawh a ni ang, depression a nei chho zui a, hei hi amah tibuaitu ber a ni. Taksa chak lo takin a awm a, Inrinni zing dar 4 khan a room bul varanda-ah chesualin, damdawi in panpui thuai a ni a, mahse a hliam tuar lo hian zing dar 4:30 vel khan a thi ta a ni.