Israel thlawpna open letter-ah Hollywood figure 700 chuangin hming ziak

Non-profit organisation, Creative Community for Peace chuan Palestinian firfiak pawl, Hamas-te'n Israel bei a, mi tam tak an that leh an man zui chungchangah, Hamas chet dan demna leh Israel an thlawp thu lantirna, open letter an tichhuak a, Hollywood celebrity leh entertainment excutive mi 700 chuangin hming an ziak.

Open letter-a hming ziaktu zingah hian Gal Gadot, Jerry Seinfeld, Jamie Lee Curtis, Chris Pine, Mayim Bialik, Liev Schreiber, Amy Schumer leh Michael Douglas-te an tel. Hamas pawikhawihna thlen chu an dem thu an sawi bakah, an mi hren mekte him taka chhuah thuai tura an phutna thute an ziak a ni.

Israel-Hamas indona thleng mekah hei hi entertaiment industry lam aṭanga thawm lian taka rawn neihna hmasa ber a ni a, celebrity zingah mimala Hamas chetna demna leh Israel an thlawp thu sawi chu eng emaw zat an lo awm tawh bawk.

Open letter-ah hian Creative Community for Peace chuan indona thleng mekah entertainment community chu Hamas-te chet dan dem turtea sawmin, hei bakah thu dik tawk lo theh darh lo turtein a ngen a, Hamas-te'n an mi hren mekte an chhuah theihna tura an theih dan kawng kawnga nawr turin a ngen bawk a ni.