Khiangte Construction Ṭhazual GOSPEL: No. 1-ah Maruati 'Ṭawngṭaina'

Maruati 'Ṭawngtaina' chu Khiangte Construction Ṭhazual Gospel chart tharah no. 1 a rawn ni ta.

Mizo Gospel artist hmeichhia zinga a lar ber pawl, Maruati hi a zai thiam bakah a zai nung a, zaia rawngbawlna lamah pawh sawm pawh a hlawh hle. 'Ṭawngṭaina' tih hla hi August 31-a a tihchhuah kha niin, he hla hi Lalremmawia phuah a ni. He hlaah hian Pathianin a mite a kalsan ngai loh leh an tana ṭha zawk tura a relsak ṭhin thu, nun a chauh lai ber pawha Krista hmel a lo en zual thu sawiin, Pathian hnenah harhna dik pea hruai turin a dil a ni. Music hi C.Mawia leh Rpa Chhakchhuak siam a ni thung a, HC Recording-ah a record a, music video hi Moonshine Studio kutchhuak a ni.

Mizo Idol aṭanga Zoram mipuite hriat lar, Lalhlumawii pawhin hma rawn sawn zelin, hun rei tak a thawm a reh hnua music video a rawn siam thar, 'Khawpui Mawi' tih chu pahnihna a nihpui. Marshall Fka-a'n a nun thar a puan chhuahna hla, 'Nunthara zawh na' pawh pathumnaah a rawn chho a, Dr Zoa 'Sam 23' leh Sailo Lalsangzuali 'Bengchheng siam lovin' tih chu Top 5-ah an lang bawk.

Ṭhazual top 10-ah hian Sawmtea Chhangte, Seraphic Choir leh Angaihtei Hnialum te pawh an la lang chhunzawm zel. Hetih lai hian chart-a rawn lang thar pahnih awmin, Amosoa Vocal Point leh C. Lalremruata-te chuan no. 9 leh 10 an rawn luah a ni.