Gibson-a'n Mihring a hlau lo

Fast & Furious-a a changtute zinga mi, rapper, model leh actor ni bawk Tyrese Gibson chuan Isua zarah a nunah engmah tlakchham a nei ngai lo tih a sawi a, mihring a hlau lo a, Pathianah a innghat tih a sawi chhuak.

Kristian ṭha tak Tyrese Gibson hian tunhnai khan instagram-ah a hausak avanga hlawhtling a ni lo tih a tar chhuak a; Gibson hian social media hrang hrangah te, tunhnai aṭang khan Kristian a nihna thu hi a tar chhuak ngun ta hle. "Show-a ka zai apiangin ka ṭawngṭai a, ka kut ka phar chhuak a nih chuan Lalpa Krista hnenah hun ṭha, amah faka chawimawina hun leh, midang hnena a thu tlangaupui theia hun ṭha min pek avanga ka lawm≠thu sawina a ni zel ang," a ti.

Gibson chuan, "Mihring ka hlau lo...ka nuna tumna mil leh thudikah chuan ka nun ka hmang a, ka kal mai ṭhin...Pathian hi ka tana source ropui ber a ni tih ka hrechiang a...Pathian chu ka thulakna hnar ber a ni...thil dang engmah ka mamawh belh tawh lo a, Isua ka neih tawh avangin a tawk a, thil dang a ngai tawh lo," a ti.

Tyrese hian tunlaia ṭhalaite zinga a thuchah pui ber chu larna, vanneihna leh hausaknaah hian hlimna leh lungawina tak tak a awm lo a, Pathianah chauh a awm a ni tih hi a ni. "I sum neih emaw, i hlawhtlinna emaw khan lungawina a pe lo ang che. Isua i hmangaih a, amaha i nun tawh tak zet chuan chu chuan hlimna leh lungawina a pe ang che," a ti.

Miin an sawi dan tur ngaihtuah avanga Pathian thu dik ngawihbopui a duh lo a, mihring hlauh ai chuan Pathian hlauh a pawimawh zawk tih a hria. Ṭih tur dik tak chu mihringte leh miin an ngaihdan tur ni loin, Pathianin a ngaihdan tur leh a hmuh dan tur zawk a ni tih a sawi.

Gibson chuan, "Pathiannin hna leh tih tur a tukte mihringin a zawm chuan, a nun thlakthleng hlawk thei khawpa ropui leh nasain Pathianin mal a sawm ṭhin," a ti a, Pathian thu awih hian lawmman a nei ngei ngei a ni a ti bawk.