Mit leh a behbawm

Hmanni chu ka tih ṭhan fo ang≠in Social website ṭhenkhatte ka thlir kual e ka tia, message leh notification ṭhenkhatte ka en zawh hnuin hunawl hnawh khah nana ka tih fo ṭhin angin fashion site ṭhenkhatte ka enkual leh den den a, eng hi nge kan uar a, eng hawi zawng hi nge ṭhalai ten kan ngaihven tihte chik rauh rauh pahin Instagram-a thil thar awm leh awm loh ka check laiin, ka mit la tak mai pakhat ka hmu ta hlauh mai.

Nikum kum laihawl vel aṭanga Zoram ṭhalaite min kangkaitu pakhat makeup, kan hmel cheidan danglam tak mai, (veng chhung tleirawl deuhte phei chu ka lo chik zual a), a tu a te mai pawh hian kan mit hmul kan hnawih dum ta kuk hlawm emaw ni chu aw, tih mai turin a hmaa mithmul nei mang pawha ka hriat ngai loh te khan mit hmul buk ṭha tak mai an rawn nei ta fur hlawm mai a; zan khat thil thua ṭo thut thei a ni lo tih a chiang reng.

Tlema kan belhchian hnu chuan Eye liner leh pencil leh eye shadow brush hmangtein uluk fein an duhthusam a nalh tur ang chuan kan ṭhalaite hian mahni in an chhuahsan hmain darthlalang hmaah an lo thai ṭhin ni awm tak a ni.

A tir lama hmui hil (matt) senduk leh uk duk kuk mai inhnawih kan intihhmuh chhoh a, Zoram ṭhalai, kei ka ni inti ve deuh chin tawh chuan kan hmui kan hnawih duk ṭhap zel a nih kha maw. Chumiina a hrin chhuah pakhat hmui duk hnu lawka kan uar chhuah tak mit hmul thai tak chuan Zoram ṭhalaite mai piah lamah nutling thlengin min run mek zel anih hi. Korean ngaihsan avanga makeup tlemte hmana pawisawi lo hmel taka incheina kan uar viau ṭhin kha rawn paih thlain, gothic leh tlema tak/ thim lam hmel hmai chei nan kan uar chho dawn chauh niin a lang. Hmel ati lang chiangin keini khawchhak lam hmel pu tan phei chuan hmel ati lang chiang deuh nge nge a ni.

Fiona Pachuau chuan chiang tak maiin a mit hmul thar, dum kak mai chu amah zuitute (followers) hoin eng nge an ngaihdan ni ang chu aw, ti niawm ziazangin Instagram-ah a rawn post a, a hmelṭha ti hrim hrim chuan a mit hmul a tih danglam hma leh hnuah pawh a hmel an hmuh dan a danglam em em lo te pawh a ni ang e. A hmelṭhat reng thu an comment mawlh mawlh a, chumi karah chuan hmeichhe tam zawk zawhna khawi hmuna tih nge? Tute tihsak nge? A insenso zatte nen lam an lo zawt mawlh mawlh bawk. Ani bakah hian tunlai ṭhalai zaithiam zinga kan duh rawn Sangtei Khuptawng leh, mi nu mah nise kan ngainat ban theih loh Feli Thangluah te pawhin an mit hmul thar an rawn post ve bawk a, milar an lo ni sa bawk nen ngaihventu an ngah phah hle a ni. Ram changkannain a ken tel, permanent makeup lamah pawh hma kan sawn nasatzia kan hmu mek a ni. Tun aṭanga hun reiloteah hian Aizawlah eyebrow micro pigmentation (mithmul lem siamna) clinic pawh kan hmu thuai dawn niin a lang. A senso zat tur pawh Rs. 6,000/- vel aṭanga inṭan tur ni awm tak a ni.

Nitina hmanhmawh tawka darthlalang hmaa mit hmul thai tak ziah ngai ṭhin kha permanent-a tih theih a nih ngat chuan hun tam tak min save sak bakah tuia tih huh palha a reh palh ang tih hlau reng renga buai ngai tawh lo khan zing i thawh aṭanga zan i mut dawn thlenga mit meng fiah tak mai han put k‚k mai kha chu tlema a to deuh a nih pawhin a phu tho i ti ve lo maw. Hmeichhe incheina turah ringawt ilo ngai ang e. Ram changkangahte chuan cancer leh natna ṭhenkhat avanga hmul tla kawlhte leh pianpui hmul ngah lo chi hrim hrimte chuan intih nalhna mai ni lovin an hmang ṭangkai tawh hle a ni. Tuna kan sawi bik eyebrow (mit hmul) mai ni lo, lua ser nei khuh nan te, sam tlakawlh tan te leh sam tlem lutuk ten micro pigmentation hmang hian nasa takin hma an lo sawn tawh a ni.

Tatoo nen a danglamna chu tattoo bikah hi chuan vun chhungril berah a bawlhlo kha hriau hmanga thunluh a nih ṭhin avangin a reh ve mai mai tawh lova, duhthusama a chhuah loh phei chuan tihdanglam ngaihna a awm tawh lo ṭhin. Micro pigmentation bikah chuan vun pawn lang ber, epidermis leh a dawt chiah derma inkarah hriau hmanga thunluh chu khawih danglam duh hlauh pawhin thil harsa lutuk anih loh vang te pawh a ni ang e. Amaherawhchu, mi tam tak tan, a bikin mit hmul nei tlem lutuk ang chite tan malsawmna anih dawn rualin uluk taka inngaihtuah hnua tih chi niin a lang. Nisa leh facial avangtea a rawng a dak theih avangte leh enkawl uluk a ngaih avangin a duh nazawng tih chi pawh a ni lem lo. Fashion hi in (lut) leh out (chhuak) reng anih avangin heng bushy eyebrows kan tih ho, model lar Cara-i'na a rawn tihlar ang te hi eng chen nge kan uar dawn tih a hriat miau loh avangin mutmawh hnarmawhah lo lak vak chi pawh niin a lang lo. A pawimawh ber chu a hunlaia kan hlimpuia kan neihin a tlin bawk a nih chuan tih mai tur, neih baka rualawh luat avanga tih erawh a ṭha lo bur.

Puipun nikhua, chhiat ni that niah ṭhalai tam zawkin kan uar em em, a ṭha a, kan la uar zel rih dawn bawk. Amaherawhchu, kan hmaifang leh a hmun azirtein thai dum dan tawk thiam ila, mite hmuha uchuak lutuk leh mawi lo khawp a awm tih hriain, tlema naupang deuh hlek phei chu min ti lang upa/ chal tih hriain a mawi hnai zawng chungin nalh takin i lo thai kawi leh dawn nia.