Future-a future a bright

Thla sarih liam ṭep chauhah khan Future chuan album hit tak mai a tichhuak a, Billboard album chart-ah pawh pakhatna hauh ṭhak thei khawpa ropui a ni. Thla sarih emaw chauh a liam tihin Future chuan album thar a rawn tichhuak a, a hit lehnghal hle a, copy 135,000 zet a hralh tling leh der tawh.

Future-a album thar hi Evol a ni a, February 6-a a tihchhuah kha a ni a, a hmalam hun pawh a ṭha dawn viauin a lang a, mahse mi pahnih an awm a, hengte chunga awm hi a harsa viau mai thei. Adele leh Justin Bieber te hi nikum aṭang tawhin top chart zingah an lang ngar ngar a, tunhnaiah Rihanna rawn lang thar hi Future-a future ti-bright lotu a ni thei. Zayn Malik hian album thar a tichhuak hnai bawk a, hengte hi Future-a tan chuan a kawng daltu lian tak tak an ni.

Billboard 200-a lang tur hian album an hralh chhuah zat an chhut mai bakah, album-a hla awmte, man chawia an download tam dan an chhut tel tawh a, chubakah internet-a an stream nasat dan azirin album tlukpuiah chhiar a ni bawk.