'Summa Supremo' LGC chhuak video

Mizoram chhim lama college lian ber, Lung≠lei Govt College chuan music video an siam a, Zirtawpni khan an music video thar hi an tlangzarh.

LGC music video thar title hi 'Summa Supremo' tih a ni a, he thu hi LGC motto a ni nghal a, Sap ṭawng chuan 'Utmost for the highest' tihna a ni. LGC-ah hian zaithiam rual 'Voices of LGC' a awm a, heng mite hian 'Summa Supremo' hi an sa. Hla phuahtu hi Lalsangpuii, Asst. Prof., Mizo Dept-a ni a, Jimmy L. Sailo leh H. Zothanpuia ten a thluk an siam thung. A hla thu leh music hi a tunlai thei ang bera siam niin Pop music leh Techno music inpawlha siam a ni a.

He hla mawi taka satu 'Voices of the LGC' te hi LGC-a zirlai - Muanawmi Chhakchhuak, Esther Khiangte, Felfeli Ralte, Hriata Tlau, Nghaktea Fanai leh Zozo-a te an ni. Music Track leh Audio Recording hi Mathana, EFX Audio, Serkawn kutchhuak niin belhchian a dawl hle a, videography hi Siama Video Production (SVP) a ni thung. He hlaah hian Mizo hlaa la tel ngai lo thil thar a awm a, a tir lama vocal harmony hi Mizo hlaah chuan a hmasa ber leh awm chhun nia hriat a ni. Cable TV lamah en theih thuai beisei a ni.