Box Office 'Taylor Swift: The Eras Tour' movie in record a siam

Taylor Swift boruak a la alh nasa hle zel. Eras Tour concert hmanga record hrang hrang a siam hnuah, a concert-na film-a a siam, "Taylor Swift: The Eras Tour" pawhin box office lamah record a rawn siam zui ve leh nghal.

"Taylor Swift: The Eras Tour" hi August thlaa Inglewood, California-a SoFi Stadium-a show vawi thum a neihna tarlan a ni. October 13 khan tlangzarh niin, tlangzarh karah hian US mtd 95-97 inkar a la lut. Concert film siam tawh zingah tlangzarh kara sum la lut hnem ber a ni. A hmaa record lo siamtu, kum 2008-a Miley Cyrus 'Best of Both Worlds' sum lak lut, USD mtd 31 chu a rawn khum chiang hle. Justin Bieber-a'n kum 2011-a "Justin Bieber: Never Say Never" aṭanga a sum hmuh zawng zawng, USD mtd 73 pawh a khum nghal bawk. Kum 50 chhunga concert movie siam tawh zingah sum la lut hnem ber a rawn ni nghal der.

Kar hmasa lama pakhatna, "The Exorcist: Believer" chu no. 2-ah a tla thla a, no. 1 nena an sum lak luh erawh a inthlau hle. Supernatural horror film hian a kar hnihnaah USD mtd 11 a lak luh belh a ni, North America-ah a sum hmuh hi USD mtd 44.9 a tling tawh.

"PAW Patrol: The Mighty Movie" chuan USD mtd 7 la lutin, no. 3-ah a awm a, no. 4-ah USD mtd 5.7 la lut 'Saw X' awmin, 'The Creator' chuan USD mtd 4.3 hmuh belh lehin Top 5 a rawn khar.