'Avatar' sequel production ṭan leh tawh dawn
Khawvela film hlawhtling ber zinga mi 'Avatar' chhunzawmna tur chu tunkar chhung hian New Zealand-ah production ṭan a ni leh tawh dawn tih James Cameron chuan a sawi.
Coronavirus hri leng vangin 'Avatar' sequel production hi March thla laihawl vel aṭang khan chawlhsan a ni tawh a, film an channa hmun New Zealand chuan lockdown a thlahdul avangin tunkar chhung hi chuan an chang ṭan leh thei tawh dawn niin film buaipuitute chuan an sawi a ni.
Producer Jon Landau pawhin Instagram-ah production ṭan leh tura an inpeihfel tawh thu a sawi a, New Zeland-a kir leh hun an nghakhlel tawh tih a sawi bawk.
Kum 2009-a tlangzarh 'Avartar' kha hun eng emaw chen chu khawvela film hlawhtling ber a ni reng a, $tluklehdingawn 2.79 lalutin 'Avengers: Endgame' kha a ngam ta lo a ni.
Ruahmanna an siam dan chuan 'Avatar 2' hi nakkum December 17 hian tlangzarh hman an tum a, December 2022-ah 'Avatar 3' tlangzarh tum leh bawkin December 2025, leh December 2027-ahte pawh chhunzawmna tlangzarh leh an tum.