Gossip Girl reboot Covid-19 vangin tikhawtlai
HBO chuan hripui leng vangin 'Gossip Girl' reboot tlangzarh hun tur chu tihkhawtlai a nih thu an tichiang.
Blake Lively, Leighton Meester leh Penn Badgley-te channa ṭhin drama series 'Gossip Girl' reboot hi kumin kum tawp lamah hian HBO Max-ah tihchhuah hman tum a ni a, mahse khawvel pumah coronavirus a len avangin kum 2021 hma chuan an tichhuak hman dawn lo niin HBO chuan an sawi a ni.
HBO Max chief content officer Kevin Reilly chuan production pawh an la ṭan lo tih sawiin, production ṭan tur erawh chuan an inring vek tawh tih a sawi. Hripui leng vangin thil awmze nei tak tak leh ruahmanna ṭha tak takte chu tihkhawtlai a ni tih a sawi bawk.
Hripui lengin nasa takin entertainment khawvel a nghawng a, 'Gossip Girl' pawh hi a zuah bik lo. Gossip Girl reboot-ah hian Emily Alyn Lind, Tavi Gevinson, Thomas Doherty, Adam Chanler-Berat leh Zion Moreno-te chu an chang dawn tih a chiang tawh a, 'Gossip Girl' hmasa kha kum 2007 aṭanga 2012 inkarah tihchhuah niin kum riat zet a liam hnuah a thar an tichhuak leh dawn a ni.
'Gossip Girl' kha season ruk an tichhuak hman a, episode 121 lai niin drama series lar ber pawl niin a changtute pawhin an larpui hlawm hle a, The Pretty Reckless frontwoman Taylor Momsen pawh a chang ve ṭhin nghe nghe. 'Gossip Girl' reboot nghakhlel takte chuan an la nghah deuh rih a ngai dawn niin a lang.