Grace Lalchhinhimi Rorelna Ni hmangin ro a rel

Mizo Idol 2013 Grace Lalchhanhimi chuan 'Rorelna Ni' hmangin Hontrade International Ṭhazual Fakna chart-ah ro a rawn rel leh ta. 'Rorelna Ni' tih hla nen hian Grace-i hian Ṭhazuala pakhatna hauh thei hla pathum a nei ta.

Mizo Idol-a thlan a nih hnu lawk khan Grace-i hian 'Ka thinlung chelhtu' hmangin pakhatna a rawn hauh a, hemi hnu hian 'Aw ropui ber' hmangin chart-ah hian a rawn ropui leh ber a, tunah 'Rorelna Ni' nen ro, a vawi hnih nan a rel leh thei.

'Rorelna Ni' hla hi November thlaa a peih fel kha a ni a, kumina Fakna chart tihchhuah hmasak ber, January 4-ah khan Hontrade International Ṭhazual Faknaah palinaah bul a rawn ṭan thei. Top 10-a lannaa palina chung lama bul ṭan nghal thei hi hla pali chauh a la awm. January 18-a tihchhuah lehah khan pathumnaah a kai chho a, February 1 khan pakhatnaah a awm thei a, a vawi hnih nan pakhatna a hauh leh. Fakna huang chhungah kumina a zawna pakhatna vawi hnih hauh thei hmasa ber a ni.

Kumina Fakna bik chart tihchhuah tawhah Feli Thangluah chuan pakhatna a luah hmasa ber a, chumi hnuah TBC Zaithanpuia chuan rawn luah ve lehin, Grace-i hi pakhatna hauh thei mi pathum zingah a lang.

TBC Zaithanpuia hla 'Sul ni leh thla' chu pahnihnaah bawk a awm leh a, palina aṭangin Emily Vanlaltluangi hla 'Ka zin kawng' chu pathumnaah a rawn chuang chhuak a, pangana
aṭangin Zorina Sailo chu palinaah rawn chhoin, pathumna
aṭangin Feli Thangluah chu panganaah a chhuk thung. Top 10-ah mi thar an awm lo a, a hmaa mite an la lang hlawm.