Grammy Awards Khawvelin Grammy show a ngaihlu

Khawvelin a ngaihsan leh a ngaihhlut, 2016 Grammy Awards chu sem a ni ta a, LL Cool J chuan thiam takin a host a, boruak a hot a, a hmuhnawm a, a chhehvel pawh a ngaihnawm. Entertainment khawvelah chuan Grammy lo chu nimin khan sawi zui tur a awm lo!

'Out of the Woods' hla hmangin Taylor Swift-i'n a rawn khuhhawng a, mipui au thawm leh kut beng thawm pawh hai chi rual a ni lo. Hemi hnu hian Underwood leh Hunt te chuan 'Take your time' leh 'Heartbeat' an rawn thlawh leh a, a fuh cher cher leh hle. Adele pawh kuminah a album lang hman lo mah se a lo phur kher mai. Tlar hma lamah a lo insawi ve nu nu mai; ani hi nakkum Grammy-ah chuan tuna a album leh hla hit te hi kan hmu ve thei tawh ang.

Show neih ṭan hma hian Red Carpet-ah milar rualte an inlan a, Ariana Grande erawh a intuam mawi lutukna lamah a kal ṭhat theih loh phah! A thawmhnaw hakin a zir lo a, Ariana hi Red Carpet a che chhe ṭep a ni, Red Carpet aṭanga a kal kiang tur pawh chakai kalin, a sir zawnga a kal a ngaih phah. Red Carpet-ah hian Beyonce a inlan lo thung a, zawhna a tam hman hle a, mahse a hnuah award sem tur erawh chuan a rawn ding chhuak leh thei.

Lady Gaga-in David Bowie hriatrengna hla a rawn sa a, a lar viau a, Dave Grohl leh The Hollywood Vampires te che erawh ani ang em chuan a lar lo a ni mai thei. Dave Drohl leh The Hollywood Vampires te hian Motorhead frontman Lemmy Kilmister pualin hla an rawn sa. The Hollywood Vampires-ah hian Johnny Depp chu an guitarist a ni a, ani bakah hian Joe Perry leh Alice Cooper te pawh an tel.

Result an puang a, lawm avanga lungchhe fe fe an tam. Chung zingah chuan Meghan Trainor a ṭanawm! Best New Artist a dawng a, a lawm ngang mai a, a mittui a tla hial. Mi tam tak lung tichhetu thung erawh chuan 'Take It Easy' phuahtu pakhat zawk, Jackson Browne leh, Glenn Frey-a band mate, Eagles ten Glenn Frey zahna an lantir kha a ni. Mi pakhat chuan, "Jackson Browne leh Eagles te an han zai chiah kha chu ka ṭap lo thei lo a ni," a ti. Earth, Wind & Fire-a mi, Maurice White thlah nan Stevie Wonder zai pawh kha a ropui khawp mai.