Deadpool-ah sum a tling hnem!

North America box office-ah chuan Deadpool a hlawhtling a, sum a lalut hnem hle a, record pawh a rawn siam. Kar tawp ni thum chhung khan USD mtd 135 ngawt a lalut.

Deadpool hi kar liam ta Ningani aṭang khan chhuah a ni a, Ningani bik chauh hian USD mtd 12.7 zet a lalut a ni. US-ah chuan February thlaa movie tihchhuah tawh zinga kar khat chhunga sum lalut hnem ber a ni a, nikuma record lo siam tawh, Fifty Shades of Grey te, The Hangover sequel zawng zawng a rawn khum thei. Fifty Shades of Grey hian nikum February thlaa US-a tihchhuah a nih chalwhkar khan USD mtd 85.2 zet a lalut a, mahse Deadpool lakah chuan a tam tawk lo.

Hei bakah hian Deadpool hian hlawhtlinna dang a rawn nei leh a, chu chu R-rated movie zingah, North America-a opening week-a sum lalut hnem ber a ni. A hmaa R-rated movie zinga opening week-a sum lalut hnem ber ṭhin chu The Matrix Reloaded kha a ni a, kum 2003 khan USD mtd 91.8 opening week-ah a lalut a, Deadpool hian a rawn khum ta a ni. Deadpool hian kar liam ta chhung khan USD mtd 150 zet a thawk chhuak hman. US pawnah USD mtd 125 a lalut bawk a, hengte nen hian kar liam ta chhunga a sum lakluh zawng zawng chu USD mtd 260 zet a tling.