Omom-i'n a hla duh ber Kraws Kawng a siam ta

Mizo Idol 2013-ah khan a rawn sa tawh a, a thiam a, a hla duh tak a ni bawk a, a zai hmel pawh hmuh a nuam. Khata a sak, 'Kraws Kawng' ngei mai kha Omom-i chuan music video-a siamin zanin aṭang hian Zonet chuan a tichhuak ṭan dawn.

Youth Icon-ah khan Joy Zairemmawia chuan he hla hi thiam takin a rawn sa tawh a, a chumi hnuah 'Kraws Kawng' hi Omom-i'n a rawn tuaihnum leh a, a nalh leh khawp ang. 'Kraws Kawng' hi Omom-i'n amaha fakna hlaa music video a siam hmasa ber a ni a, tuna mi nen hian music video chu pathum a nei dawn ta a ni. Nikum November thla aṭang khan recording an buaipui tawh a, kumin January thla chhung zawng kha shooting nan an hmang leh a ni.

'Kraws Kawng' hi Omom-i'n a pa, K. Lalchamliana hla phuahte zinga a duh ber a ni a (K. Lalchamliana leh hla phuah thiam fam ta BDA te phuah a ni), Idol-ah pawh khan a sa tawh a ni. "Elimination Round a zawh khan ka sak leh tur atan 'I pa hla phuah zinga i duh ber' min ti a, he hla hi ka thlang nghal a ni," a ti. Idol 2013-ah khan Top 20-ah leh Final zanah te a sa. "Ka pa hla phuah zinga ka duh ber a ni a, a hla thu hi a ṭha ka tiin ka duh em em," a ti.

Mizo lengzem rimawia lar leh hlawhtling ṭhin K. Lalchamliana a pianthar khan khawvel lam ngaihna amahah a la lian ve a, thlÍmna leh harsatna tam tak a hmachhawn a ni. A khawvel ṭhianten an tisa duhzawng an la tih ve reng laiin ani erawh chuan, ch‚kin la ph˚r ve teh mah se a tih ve a rem tawh si lo; chutiang dinhmun aṭang chuan he hla hi a rawn piang chhuak ta a ni.

"Recording leh video shooting vel, a engkim mai hi a ṭha ka ti a, uluk pawh min uluksak hle a, ka duh ang tak a ni. Ka nuin min phurpuiin kawng engkimah min pui a, ka lawm em em. Chu mai bakah ka ṭhianten nasa takin min pui bawk," tiin Omom-i chuan a sawi. 'Kraws Kawng' hi a music Kima Chhangte siam a ni a, Foster-a record niin, videography hi Milestone Pictures kutchhuak a ni.