Kum 9-17 inkar 60%-in ni tin darkar 3 chuang social media khawih
Community-based social media platform, LocalCircles-in tun hnaia zir chianna a neihah, India rama kum 9-17 inkar zinga a tam zawk, 60% chuan ni tin social media emaw, gaming site emaw luhna atan darkar thum chuang hun an hmang. Darkar ruk chuang hun hmang hi 22% an awm bawk.
US surgeon general, Dr Vivek Murthy-a'n 2022 report a siamah khan, ni khatah naupangin social media khawihna atana darkar thum chuang hun a hman chuan rilru hriselna lam nghawngin, depression leh anxiety vanga harsatna a neih theihna a sang niin a sawi. American Psychiatric Association-in Diagnostic and Statistical Manual of Mental Disorders (DSM-5) a tihchhuahah, gaming addiction chu mental disorder angin a lo sawi bawk a ni.
LocalCircles chuan survey an neihna aṭang hian social media khawih nasa naupang/tleirawlte hian tharum thawh an awlsam bakah, an dawhthei loin an awm hle hle thei lo niin an sawi. Screen hmaaa hun an hman rei avangin lu na leh hnung na te an neih phah bawk. Mi 10 zinga pakhat chauhin rei tak social media/gaming khawih vanga an fate an hlim phah sawt thu an sawi.
Sorkar laipui chuan naupang kum 18 hnuai lamte'n apps an khawih tur chungchangah nu leh pate remtihna neih a ngaihna tura dan, Digital Private Data Protection Law pawh peihfel thuai tumin a buaipui mek tih LocalCircles-a Sachin Taparia chuan a tarlang.
Psychiatrist Dr Harish Shett chuan social media chu addict theih tura duan a ni tiin, "Naupang zinga 40% chuang hian social media leh gaming hi an addict tawh a ni. Gadget addiction hripuiin min nuai mek a, hei vang hian an nungchangte siam ṭha tura public campaign neihte a ngai tawh a ni," a ti.
Dr Shett chuan Maharsatra-a Mohityanche Vadgaon khaw tihdan entawn a ṭhat thu a sawi. He khuaah hian kum 2022 kum tawp lam aṭang khan zan tin dar 7-ah siren tihrik ṭhin a ni a, khaw mipuite chuan phone leh electronic device-te off-in, darkar khat leh minute 50 chhung khawih loin an awm ṭhin. He hun hi puitlingte'n naupangte kawmna hun atan leh, lehkha chhiarna hun atante an hmang ṭhin a ni.