Good Friday atan Betea a inbuatsaih mek

Ṭhazual chart-a pakhatna lo hauh tawh, Fakna hla huang chhunga Mizo mipa kan neih ṭhat pawl ni reng ṭhin Betea chuan Good Friday atan thil thar a buatsaih mek a, Good Friday hma deuh aṭang chuan min ngaihthlaktirin, min entir thei tawh ang a, Holy Week-ah music video thar ṭha kan nei thei dawn.

Betea'n music video siam tura a hma chhawp, recording a tih zawh vek tawh hla hi hla lar a ni a, Sap hla aṭanga lehlin niin, amah ngei pawh hian a hma aṭanga a lo sak fo tawh
ṭhin. He hla hi 'Ka tan i tuar' (Above All) hla kha a ni a, Good Friday hma hi chuan a tichhuak ngei ngei dawn, a dam a nih phawt chuan. March thla tir aṭang hian shooting lam a buaipui ang. A music hi Lal K. Sailo a ni a, voice hi Princeton Recording-a thun a ni. Video hi RDS-in an khawih dawn thung.

'Ka tan i tuar' tih hla hi Betea hian KṬP Rorel Inkhawm hmasa ber, Armed Veng Kohhranah khan a sa tawh a, Central KṬP-in Praise & Worship video a siamah khan a sa tawh bawk. Sa nual tawh mah se Betea hian a mala music video-a siam ṭhain a hria a, a siam ta a ni. "Music video tur ka buaipui mekah hian lawmna tur ka ngah hle mai. He hla letlingtu Pu Mavuana chung≠ah ka lawm em em a, Republic nula zaithiamhoin a part min saksak bawk a, an chungah ka lawm," tiin Betea chuan a sawi.

"A thu hi a ṭha ka ti a, min hneh vel vek a ni ber; bakah a thluk hi a nalh a, a ṭha hle. Tunah chuan music video siam pawhin awmzia a nei a, MDM hmalakna a ṭha ka tiin, zaithiamte tan chuan a hlu tak zet zet a ni. Kan zai leh music video
aṭangin sum kan hmu let a, Ṭhazual chart-a kan lan mai bakah, MDM playlist-a kan lan avang te, royalty te nen sum kan hmu ve thei ta a, a lawmawm hle a ni," a ti.

Betea hian kumin chhungin music video pathum tal chu tih≠chhuah a tum a, recording tih sa pawh a nei nual. Hei bakah hian Good Friday puala Ṭhutmuan Rimawi buatsaih tur atan a inbuatsaih uluk hle bawk.