Fashion fiesta British lal chhungkaw incheina

Incheina chungchang kan ziah dawna kan sawi hmaih theih miah loh tur, khawvelin incheina dangdai leh danglam kan buaipui luih luih lai pawha style danglam ngai lo leh kum zabi tam tak kal ta aṭang pawha nalh, tlo leh chul thei lo, changkang bawk si, khawvel lalte incheina hi zirchian tham a lo tling ngei mai. Khawvel ram ṭhenkhatah lal an la neih laiin ṭhenkhat erawh nei lem lo a tam zawk kan ni tawh a, heng lalte hian min awp ve lo mah se mihringte ziaa bet tlat, mahni aia chungnung zawk ngaihsanna hi tu pawhina kan neih avang te pawh a ni ang e heng lalte nundan, chezia leh an chanchin kan ngaihven tlang vek a ni. A ngaisangtute leh zuitu tam tak ten an chanchin piah lama an ngaihven em em mai pakhat chu an incheina thawmhnaw leh eng ilo te a ni. Lal hrang hrangte incheina kan zirchiang vek seng dawn lo, India ram nen pawh a inzawmna thuk tak nei British lal hi thlur deuh bik tawn ila; British lal chhungkua hian khawvel mite ngaihven an hlawh zual bik a ni.

Lal chhungkua sawia tunlaia thawm nei lian ber Kate Middleton (Duchess of Cambridge) phei hi chu a thawmhnaw inbel leh incheina hi mite ngaihven a hlawh zual bik emaw ni chu aw tih turin a chanchin ziaktu ten a thuam inbel, design-tu leh eng brand nge a inbel a, a bun an tarlang nasa hle a, Prince William nena an inngaihzawn lai aṭang renga a inchei dan simple tak mai leh zahawm tak si avang tein ngaisangtu leh duhtu a ngah reng a ni. Vawiina lal chhungkuaa a tel ve hnu thleng hian kawr lar tak leh uchuak taka a inthuam kan hmu ngai awm love. Simple deuh si changkang tak leh mawihnai taka a inthuam hi kan hmuh zin ber a ni a, inchei thiam nih a hlawh na-chhan te pawh a ni ngei ang. Hlui thei lo/ chul thei lo, mawihnai taka inchei thiamte hi khawvelin inchei thiam tia kan sawi te an ni ziah reng a ni.

Lal chhungkua dang ang lo takin Kate hian mi nawlpuiina kan dawr ṭhin Zara, H&M leh Top Shop te a inbel nasa hle a, hunpui leh pawimawhah te erawh British fashion designer lar leh dangdai tak mai Alexander Mcqueen (famta) thawmhnaw siamte a inbel nasa ber a, Jenny Packham thawmhnaw te pawh a inbel langsar zinga mite an ni. Heng bakah hian tunhnaiah Dolce & Gabbana thuamhnaw, lace ziarang mawi tak tak a inbel hmuh tur a awm zeuh zeuh bawk. Designer lar leh tunlai deuhte lal chhung-kua meuhin an inbel hi a awm viau i lo ti mai thei a, amaherawhchu rin loh tak mai leh mak ve tak maiin lal chhungkuate hian kum tam tak kalta aṭang tawha an thawmhnaw siamtu leh buatsaihsaktu bik an neih ṭhin vangin thil thar a ni hrim hrim. Brand dang an va ha thei lo ni lovin a tlangpuiin lal chhungkua chanchin lo hrechiang tawh leh hun kal tawha vawi tam tak an thawmhnaw lo siamsak tawhtute chu an lo rintlak deuh nge nge ṭhin avangin designer ṭha leh lar satliah an pan ngai meuh lo.

Prince William nena tiam tlat e an tih dawn ṭuma a mo thuam inbel mawi leh changkang tak mai pawh kha Alexander Mcqueen kutchhuak niin 1950 chhoa English lalte inchei dan entawn leh Carrickmacross technique-a lace design mawi tak 2,50,000 pound man hu lai a ni a, lal chhungkaw inchei dan kulmuk lutuk rawn ṭhiatin Queen Elizabeth II phei chuan a kamkhat hial a nih kha. Midang ang lo takin tlema pawnfen chhing deuh te leh arh deuh hlek te inbel a ching reng a ni. Hemi avang erawh hi chuan ngaisangtu leh inchei thiam titu a ngah phah viau thung.

Lal chhungkaw incheina sawia rilrua lang nghal em em mai an lukhum khum ṭhinte pawh hi lal chhungkawho incheina thawmhnaw nena inzawm tlat anih avangin an tan a pawimawh em em a, a khum lartu pawh an ni reng a ni. Chuvangin lal chhungkua lukhum siamtu nih chu intihtheihna tham a tlin avangin hman lawka Queen Elizabeth-te inneih Diamond Jubilee-a Kate-in a khum peach colour dangdai leh mawi em em mai kha Jane Taylor pawhin a lar phah viau a nih kha. Ani hian lal chhungkaw zinga mi Zara Phillips leh Princess Sophie-te lukhum pawh a lo siam-sak tawh bawk a ni. Rachel Trevor Morgan phei hi chu official taka lal chhungkua lukhum buatsaihtu a ni a, abikin lalnu Queen Elizabeth hian a lukhum siam a khum ziah tih tur ang a ni. 2006 aṭang daih tawh khan lalnu tan hian occasion hrang hranga a thawmhnaw mil turin a siamsak ṭhin. Ani phei hi chu lal chhungkua mai ni lo, fashion magazine leh milar dang Lady Gaga tena an dawr ṭhin ber a ni nghe nghe.

1940 aṭang daih tawh khan Norman Hartnell chuan Princess Elizabeth, tuna Queen ni ta hi a thuam a lo siamsak daih tawh a, 1950 chhoah erawh Hardy Amies-in a hnung rawn zui vein 1970 dawn thlengin a hna hi a chhunzawm zel a, Norman-a assistant ni
ṭhin Ian Thomas chuan bul rawn ṭan ve lehin, ani thih hnu hian Maureen Rose-in 1980 kum tawp dawn thleng khan a siamsak a ni. 1990 chhoah erawh John Anderson chuan a rawn thlak ve leh a, ani hnu hian lalnu designer naupang ber ni turin Steward Parvin chuan 2000 chho aṭang khan vawiin thlengin a design-sak thung. Angela Kelly hi lalnu mimal senior dresser niin vawiin thleng hian lal chhungkaw thawmhnaw duang chhuaktu pawimawh tak a ni chho ta zel a ni.