MSL Season 2 Dance Battle Semi Final aṬang chauhin battle

Nikuma hlawhtling taka lo neih tawh, Mizoram Super League Dance Battle chu kuminah pawh neih leh a ni dawn. Naktuk, Thawhlehni zan hian MSL Super League Season 2 Dance Battle hi Tip-off neih a ni leh tawh dawn a, half time-ah dance battle hmuhnawm tak tak kan hmu chho leh dawn. Mahse a tir phat aṭanga Dance Battle kan hmuh ang kha chu a ni tawh dawn lo a, Season 2-ah hi chuan MSL Semi Final Match aṭangin halftime dance battle kan hmu thung ang.

Semi final aṭang chauha half time dance battle kan hmuh dawn avangin Dance Crew pali chauh thlan chhuah an ni dawn a, audition hmangin dance crew tur hi thlan chhuah tur a ni. Dance crew tinah hian member 4 aṭanga 7 inkar an awm tur a ni a, dance crew a duh apiang tan tel theih a ni.

MSL Season 2 Dance Battle-ah hian pakhatnain Rs. 20,000, pahnihnain Rs. 10,000, pathumna leh palina – Rs. 5000 ve ve a ni ang. Judge tur zingah hian, nikum lama lo judge tawh Alan Rinawma leh Nutei Pautu te chu an rawn let leh ang a, anni pahnih bakah hian nikuma Guest judge lo ni tawh leh Mizo dancer tawnhriat ngah ber zinga mi, Steve Lalruatkima ten MSL Best Dance Crew tur hi an thlang dawn a ni.

MSL Season 2 Dance Battle atana dance crew audition ve duh te chuan, an crew lam lai video pahnih submit tur a ni dawn a, registration form leh Dance Battle kalphung kimchang inziahna chu vawiin Thawhṭanni chawhnu aṭang hian Mizo Dance Camp Studio, Electric Veng, Aizawlah lak theih a ni ang. Dance crew final 4-a thleng pha kher lo mah se audition video
ṭha si te chu, Zonet Cable TV-ah an video hi pek chhuah ṭhin a ni dawn.