Lawmi tan lawmna Ṭhazualah a zawnin pakhatnaah vawi 4
Lawmi Khiangte hlim lai a sei zel a, Hontrade International Ṭhazual Lengzem 10-ah pakhatna a rawn hauh leh ta. Kumin hian Lengzem chart bik hi vawi 4 tih-chhuah a ni tawh a, kum bul aṭangin Lawmi Khiangte hian pakhatna a la hauh char char a, a zawnin ṭum li pakhatna a hauh tawh.
DJ Lalvenhimi hnua hla pakhat hmanga Ṭhazual Lengzem chart-a pakhatna hauh thei ngun ber a ni a, a zawna ṭum li hauh thei hmasa ber a ni bawk. DJi hian kum 2013 khan 'Inṭhen lo'ng' tih hla hmangin pakhatna vawi nga a hauh a, 'Ka chan hi' tih hla hmangin pakhatnaah vawi nga bawk a hauh. Hemi hnua hla pakhat hmanga pakhatna
ṭum li chin hauh thei leh hmasa ber chu Lawmi Khiangte hi a ni a, a hla 'Kan hlim lai' hmangin hlawhtlinna ropui hi a rawn chang.
Lawmi Khiangte chuan, "Ṭhazualah a lan chu ka beisei a, mahse hetiang taka a hlawhtlin hi chu ka ring pha lo. Joseph-a hla kha a ni a, a hunlai khan video leh recording lamah kan la hnufual deuh a, tuna ka'n siam thar a, hetia a hlawhtlin takah chuan Joseph-a hlate hi miin an lo duh ṭhinzia leh an lo la duhzia a lang chiang hle a ni. Ani hi ka naupanlai aṭanga Mizo mipaa zaithiam ka tih ber leh hmelṭha ka tih ber a ni," a ti.
Lawmi hi tunah hian college-a test an neih rih avangin music lamah a duh angin hma a la la thei chiah lo nachungin, Radio-a hla thun thar tur chuan a inbuatsaih mek. Hla pali thun a tum a, a hla thun tur tak erawh a la thlang fel lo deuh.
Remkimi Cherput chu pahnihnaah bawk a awm leh a, Lawmi Khiangte awm lo se, he hla pawh hi pakhatna tling thei tur khawpa hla ṭha leh mawi a ni a, a satu aw nalh danglam tak pawh hi a ngainatawm. Palina aṭangin F. Zomuanpuia chu pathumnaah a chho a, a hmaa pathumna Mampuii Thlauthang chu palinaah a chhuk ta thung.
Top 10-ah hian Pensy-i hla 'Chelh ding rawh' tih chu panganaah a rawn lang thar a, J&J-in kum eng emaw ti hnua duet an siam leh hmasak ber, anime nena chawhpawlh music video hmuhnawm dangdai tak 'Ka hmangaih ber che' tih hla chu 10-naah bul a rawn ṭan thar a, TRC Various Artist hla 'Romanians' chu pariatnaah a rawn lang thar bawk.
Top 10 aṭangin Josephine Lalawmpuii, Abby Chawngthu leh C. Sanga te an tawlh liam ve ta thung.
Hontrade International Ṭhazual 10
1 Lawmi Khiangte - Kan hlimlai
2 Remkimi Cherput - Zoawi lelte a fam ta
3 F Zomuanpuia - Don't let me down
4 Mampuii Thlauhthang - A pawi ngei e
5 Pensy - Chelh ding rawh
6 Samuel Chhangte & Sangkimi Khiangte- In ṭhen lawng
7 Mathlenga - Mizo thawnthu
8 TRC Various Artists- Romanians
9 Ananda - Zo lanu leng
10 J& J - Ka hmangaih ber che