Billboard-ah Adele album an hralh hnem leh ber
Billboard album chart-ah Adele chuan tlakhniam lam a pan mai tawh turah mi tam takin a ngai tawh a, mahse a ni lo; a ropui ngai bawk kha an rawn ropui leh a ni. Future te, David Bowie album te pakhatnaah an rawn lang leh nachungin a kal kal a, Adele album 25 chu pakhatnaah bawk a rawn kir leh.
25 album hi kar tawp chhung khan copy 151,000 zet an hralh belh leh a, heng zinga copy 125,000 hi album pangngai a ni a, a bak chu album tlukpui a ni. Grammy-ah khan 'All I Ask' tih hla a sa a, technical lam a chian loh avangin mi tam takin an khawngaih a, Grammy buatsaihtute dem lek lek pawh an awm. Hetiang boruak duhawm loh hi awm mah se, Adele album hralh erawh a kal em em reng tho a ni.
Grammy-ah khan 'Love Yourself' leh 'Where are u now' tih hlate a rawn sak pawlh kual a, a mawi viau. Hei vang hi a ni mai thei, Justin Bieber-a album hit 'Purpose' chu pahnihnaah a la awm thei a, kar liam ta chhung khan copy 84,000 a hralh. Rihanna album Anti chu pathumnaah awmin copy 79,000 a hralh thung.
Album lang thar zinga thleng sang ber chu Joey leh Rory te album 'Hymns' a ni. He album hi Gospel album a ni a, Kristian hla ṭha, engtik lai maha chuai ngai lo leh mi tam takin thlarau damna an lo chanpui tawh ṭhin hlate khungkhawmna a ni a, kar liam ta chhung khan copy 70,000 zet an hralh. He album hi Mizote tan pawha album ngainatawm a ni ang, bluegrass/ country music style a ni a, a chhunga hla awmte hi 'I surrender all' (I hnenah ka inpumpek e), 'The Old Rugged Cross' (A saw raltiang tlangah), 'How Great Thou Art' (Aw Lal Pathian), 'It is well with my soul' (Kawvel hrut chhuak ila) tih leh Kristian hla ṭha dangte nen a vaiin hla 13 a awm.
Billboard album chart
"25" - Adele (151,000)
"Purpose" - Justin Bieber (84,000)
"Anti" - Rihanna (79,000)
"Hymns" - Joey + Rory (70,000)
"Traveller" - Chris Stapleton (51,000)
"Beauty Behind the Madness" - The Weeknd (51,000)
"Blurryface" - Twenty One Pilots (45,000)
"1989" - Taylor Swift (43,000)
The "Now 57" Album - Various Artists (40,000)
"EVOL" - Future (40,000)