Israel-Gaza indo avangin MTV Europe Music Awards 2023 ṭhulh

Israel sipai leh Gaza Strip-a Hamas-te indona thleng mek avangin MTV Europe Music Awards 2023 chu ṭhulh a ni.

Organiser Paramount Global chuan MTV EMA chu global music lawmna pual a ni ṭhin tih a sawi a, mahse, Israel leh Gaza buaina leh chhiatna rapthlak tak tak thleng mek karah hetianga thil lawmna hun lo huaihawt chu a hun lo nia a hriat thu a sawi. 'Mi sang telin nunna an chan tawh a, anni sun hun zawk hi a ni," a ti.

MTV EMA hi November 5-a Paris-a neih tum a ni a, perform tur zingah hian BTS Jungkook leh Leigh-Anne te pawh an tel. Best artist award dawng thei turah Doja Cat, Miley Cyrus, Olivia Rodrigo, SZA, Taylor Swift leh Nicki Minaj-te chu nominate an ni bawk.

Kum 1994 aṭang khan EMA hi neih ṭan a ni a, a hmasa ber hi Berlin, Germany-ah neih a ni. Paramount chuan kumina show neih tur ai hi nakkum November thlaah neih a ni zawk dawn tih a sawi.

Israel-Gaza Strip indona avang hian event eng emaw zat ṭhulh a lo ni tawh bawk. Tun thla tawpa Egypt rama neih tura ruahman, El Gouna Film Festival pawh tiam chin awm loin sawn hlat a ni tawh bawk.