MZI leh MCCA-in seminar buatsaih dawn

Mizo Zaimi Inzawmkhawm (MZI) leh Mizoram Choral Conductors Assn. (MCCA) chuan vawiin hian Aijal Club-ah Zaipawl hrang hrang enkawl ṭhinte pualin seminar an buatsaih dawn. Dr. Henry Lalmawizuala leh Dr. Steven L Ralte te chu resource person an ni ang.

Seminar thupui atan hian 'Cultivating excellence building and leading a dynamic choral team' tih hman a ni dawn. Chawhma lam chu MCCA Vice President Lalpiangliana'n a kaihruai ang a, chawhnu lamah MZI-a zaipawl sub-committee Chairman Chhawra Khiangtein a kaihruai thung ang. Thupui ṭhen hrang hrang zirho leh sawiho bakah, zawhna leh chhanna hunte an hmang ho dawn a ni.

Resource person tur Dr. Henry Lalmawizuala hi zaipawl lama tawnhriat leh sulhnu nei ṭha tak niin, Bible Society zaipawl BESY Choir-ah 2001-2004 chhungin member a ni a, 2005-2010 thlengin conductor a ni. Salvation Army Boundless Congres 2015-a London-a neihah khan zai leh zaipawl kaihruaiin a tel. Kum 2010-2013 chhung khan Aizawl Temple Corps Songster Conductor a ni tawh bawk.

Resource person tur pakhat zawk Dr. Steven L Ralte hi kum 2018-a Asia Pacific Choir Games & Grand Prix of Nations-a Mizo Cardinal Choir te Gold Medal lakpuitu, Worlad Choir Games-a Silver medal lakpuitu a ni. Handels Messiah : Christmas Edition leh Handels Messiah tonic solfa te buatsaihtu leh Mizo ṭawnga lettu niin, Zarkawt Presbyterian kohhran zaipawl Conductor a ni.