Netflix-in subscriber mtd 8.8 neih belh

Streaming media company, Netflix chuan password sharing a tihtawp hnuah, thla thum liam ta chhungin subscriber maktaduai 8.8 a neih belh. Kumin third quater-ah subscriber hi mtd 247 a nei tling ta.

Subscriber an pun nasat avangin third-quater a company share pawh 13.5% zeta pungin, a punna ringawt pawh hi USD mtd 393.45 a tling a, a market capital hi USD tld 21 dawn a ni tawh.

Netflix hi streaming service dangte aiin a inzarpharh zawk a, foreign-language programme pawh a nei tam zawk bawk. Hollywood actor-te nawrh huaihawt mek avanga film release hun tihkhawtlai tam tak awm chu streaming service dangte angin an tuar nasa ve lo a ni. Hemi rual hian nawrh hian a nghawng ve tho a, US-based show eng emaw zat a tihchhuah hun tur chu tihkhawtlai a ngai ve tho a ni.

Subscriber an pun chhoh mek karah, Netflix hian Ningani aṭang khan ram pathum - US, UK leh France-ah subcription fee a tipung. Ram danga tihpun a nih hun tur erawh an la sawi lang lo. India ramah password sharing titawp ve mah se, fee erawh tihdanglam a ni lo. India ramah hian mobile plan man Rs 149 per month, basic plan Rs 199 per month leh, standard leh premium plan Rs 499 leh Rs 649 chu a ngai angin a la kalpui a ni.