Hollywood actor-te ni 100 nuar tling ta

Hollywood actor, SAG-AFTRA-te'n Alliance of Motion Picture and Television Producers (AMPTP) laka lungawi lohna lantir nawrh an huaihawt chu Inrinni kha a ni 100-na a tling ta.

SAF-AFTRA leh AMPTP hian inremna kawng zawngin inbiakna nei ṭhin mah se, SAF-AFTRA-te thil phut ṭhenkhatah inremna an la siam thei lo a ni. Thawhlehni khan inbiakna neih chhunzawm leh an tum. Actor-te hlawh tihsan te, AI hman uar lohte an phut tel. Show hrang hranga streaming revenue insem tura an rawtna siam chu AMPTP lam hian an pawmpui thei lo a, an pawm a nih chuan studio lam hian kum tin USD mtd 800 vel an hloh dawn niin an sawi.

Actor-te nawrh huaihawt vang hian US-based TV show tam tak tihtawp a ni a, film chan chhunzawm theih loh leh tihchhuah theih lohin eng emaw zat an awm mek. Hun rei tak nawrh an huaihawt tawh avang hian actor leh crew member tam takin sum lamah pawh harsatna an tawk tawh a, heng mite ṭanpuina tur hian top actor eng emaw zatin sum pawh an theh chhuak tawh bawk.

Top Hollywood star-te chuan actors union hi nawrh titawp tawh turin an ngen bawk a, Oscar winner George Clooney leh top star dang eng emaw zat chuan nawrh an tihtawp chuan kum thum chhungin union tan USD mtd 150 pek an tiam a ni.