Chris-a'n thinlungin a rawn fak dawn

'Kawng min hawn ru' a tih hnuah music video a nei leh lo vang vang a, mahse hla leh music lama kan chhuanvawr Chris MS Dawngkima chuan music video thar a rawn tichhuak dawn hnai ta

Chris MS Dawngkima music video tihchhuah tur hi 'Thinlungin ka fak ang che' tih hla a ni a, he hla hi kum 2012 November 13-a a phuah kha a ni. Hla phuah a thiam a, KṬP General Conference hla buah pawh a hla eng emaw zat a lo awm tawh bawk. Music-a a tawnhriat tawhte ngaihtuah vang vang pawhin, a hla thar hi a ṭhain a nalh ang tih a rin theih.

'Kawng min hawn ru' tih hla hmang khan hlawhtlinna ropui tak a chang a, Ṭhazual Fakna chart-ah pawh pakhatna a hauh mai bakah, 2015 Ṭhazual Music Video Award kha a dawng bawk. Tuna a hla thar hi tunkar chhunga tihchhuah tura a ruahman a ni a, a thlen san ring ila kan ring sual lo mai thei.

"Duhsaki nena kan sak 'Tho la eng rawh' tih kha kan shot vek tawh a, mahse kan dah rei lutuk a, duhthu a sam ta zan lo a, thil thar ṭha leh khawl changkang zawk a awm tak avangin siam ṭhat leh a ngai. Chumi hma chuan he hla 'Thinlungin ka fak ang che' tih hi ka tichhuak ta zawk a ni," a ti.

Chris-a hian album a buatsaih mek bawk a, mahse hun a neih tawk loh avangin a chhunzawm hlei thei lo. Kumin hi chuan siam zawh hman hram a, kumin kumtawp lam emaw, nakkum kum tir lam emawa tihchhuah a tum. "Album siam ka rilruk a, hla paruk dah kan tum a, hla panga hi chu kum 2012 aṭanga ṭanin, kum 2014 May khan kan shot zo vek tawh. Hla pahnih chu kan edit tawh nghe nghe a, pakhat chu 'Kawng min hawn ru' tih kha a ni a, pakhat dang leh chu tuna mi hi a ni," a ti. "Pathian hian hla min pe ve ṭhin si a, chuvang chauh chuan insit chungin video ka siam ve leh ṭhin... Mi pawh hian mak min lo ti ang tih ka hlau viau ṭan tawh. Min buaipuitu ka nei tha thin bawk si, kei aiin an phur mah emaw tih tur a ni a, ka vannei ka inti hle thung," a ti bawk.

"Thinlungin ka fak ang che" music video director hi Benjamin Hnamte a ni a, L. Ṭhakima, RIPANS chuan a produce a, video hi SVP kutchhuak a ni.