Police vrs Beyonce Police-ten Beyonce ṭawng turin an duh

Super Bowl 50-ah khan Beyonce Knowles a zai a, khatah hian Black Panther style an rawn lantir a, hei hi US-a police-te chuan an ngai thei vak loa police-te chuan hei hian police-te chu tharum hmanga hma-chhawn a pawi lo tih lantirna angah an ngai a ni.

Super Bowl 50-ah khan Beyonce leh a dancer te chu a dum hlirin an inthuam a, an chet dan leh lâm danah te Black Panther group thlawp ang zawnga an lan avangin police-te chuan an duh lo hle. New York Police Dept chuan Beyonce hian police do zawnga tharum hman leh thawh a thlawp an rin loh thu sawiin, chuvang chuan mipuite hnenah pawh Super Bowl-a a perform-ah khan Black Panther zawm emaw thlawp emaw zawnga ti a ni lo tih sawi chhuak se an duh a ni.

Super Bowl-a a chet hnu lawk khan Miami-a police union chuan Miami khuaa Beyonce-in concert a neih tur chu an boycott dawn tih an sawi. NYPD chuan Super Bowl-a Black Panther inspired set kha a awmzia sawifiah turin an duh a, tunah rih chuan Beyonce hian engmah a la sawi chhuak lo a, police lam pawh hian
ṭawngkam bak hi chuan an duh lohna an la alntir rih lo.

Kar kalta khan Miami Fraternal Order of Police-a an president, Javier Ortiz chuan April 26-a Miami-a Beyonce concert neih tur chu an boycott dawn tih an sawi a, "Ram puma dan kengkawhtute pawh min thlawp turin kan ngen a, US hmun hrang hranga a concert-te boycott turin kan hrilh a ni," a ti. An boycott chuan security lamah beyonce hian harsatna a tawk ve viau ang.

Khami ṭuma a che kha police mai bakah New York Mayor hlui, Rudy Giuliani chuan a sawisel nasa hle. Hman ni lawk khan Beyonce hi New York-a Manhattan-a che tur a ni a, hetah hian Giuliani leh mi ṭhenkhat chuan Beyonce duh lohna lantir an tum a, mahse Bey hi a kal leh tak loh avangin an ṭhulh a ni.