BOX OFFICE: Film thar awm loh zar zoin The Croods: A New Age bawkin ro a rel leh
Kar hmasa khan film thar lian tham North America-ah tlangzarh a awm lo a, chumi avang chuan a zawnin kar thum chhung The Croods: A New Age chuan Box Office-ah ro a rel ta a ni. Half Brother bawk pahnihna ni lehin Elf (Re-release) chu pathumna a ni thung.
Kar thum chhung The Croods: A New Age
Comuputer animated film The Croods: A New Age hi kar tawp liam taah khan theatre 2,115-ah pek chhuah a la ni a, $3,060,535 a lalut leh.
The Croods 2 hian ni 19 chhungin North America Box Office aṭangin $24,310,640 a lalut tawh a, ram dang a ṭangin $52,321,000 lalut tawh bawkin khawvel puma a sum lakluh chu $76,631,640 a tling tawh. Hrileng kara theatre aṭanga sum lalut tam pawl tak a ni tawh a ni.
US-ah chuan theatre tam zawk khar a ni leh tawh a, khawvela film industry lian ber ni ṭhin kha tunah chuan khawvela film tlangzarh chakawm lohna ber hmunah a chang zo tawh a ni. The Croods 2 tih loh hi chu theatre 2k-a chhuah tlin film dang a awm lo.
Pahnihna Half Brothers bawk
Kar hmasaa pahnihna Half Brothers bawk pahnihna a ni leh a, kar tawp liam taah khan theatre 1,386-ah pek chhuah niin $495,025 a lalut.
Pathumna chu Elf (Re-release) a ni a, theatre 850-ah chhuah niin $400,000 a lalut a ni.
Film Re-release fuankhawmna Box Office
North America-ah chuan film thar tlangzarh a awm meuh loh avangin film Re-release an pechhuak nasa hle a, sum lalut tam zual 10 zinga pali lai chu film tlangzarh nawn leh an ni.
Freaky chu palina a ni a, The War with Grandpa chu pangana ni thungin All My Life chu pariatna a ni a, kar hmasaa pasarihna Come Play chu 10-na a ni thung. A dang zawng chu film tlangzarh nawn lehin an luah.
Film tlangzarh thar erawh tlem azawng a awm a, top chart erawh an thleng pha lo. Chung zingah chuan Wild Mountain Thyme leh Farewell Amor-te pawh a tel.
China Box Office-ah ‘Bath Buddy’a che ṭha
Khawvela film industry lian ber ni mek China box office-ah chuan Chinese action comedy film Bath Buddy chu sum lalut tam ber a ni a, kar tawp liam taah khan $maktaduai 28.1 a lalut.
Kar hmasaa pahnihna The End of Endless Love chuan $mtd 11 a lalut a, pahnihna a ni a, US-a pakhatna ni mek The Croods: A New Age chu pathumna a ni thung. US aiin The Croods 2 hian China-ah sum a lalut hnem zawk a, $mtd 6.4 a lalut a ni.