Rihanna a la damlo zel

Grammy-ah pawh a aw bawm ṭhat loh avangin a zai thei lo a, Rihanna hi a la dam chiang dawn lo a nih hmel, a tour neih ṭan tur pawh a sawn hla rih hlawm.

Rihanna hian February 26 aṭang khian Anti tour nei ṭan turin a hma chuan ruahmanna a siam a, California-a San Diego-a bul ṭan tur a ni. Mahse a concert neih tur hi a sawn hla a, San Diego mai bakah, hemi hnua hmun pariata concert a neih turte pawh March aṭanga May thla chhunga neih turin a sawn hla vek.

Riri enkawltu doctor chuan a damdawi eite a dam chakpui thei lo a, chungvang chuan, a hriselna venthawn avangin la zai loin, la inenkawl se a ṭha zawk a ti. Anti World Tour a neih tura North American leg-ah hian a bialpa nia an sawi, rapper Travis Scott chuan opening act a neihsak dawn a, Europe a thlen hunah Big Sean leh The Weeknd ten an pui bawk dawn.

A damloh avanga a concert tur a ṭhulh mek lai hian Rihanna hi lâm tur chuan a dam hle a ni âwm e. Hman zan khan party a awm a, hetah hian Rihanna hi a lâm nasain, a mawng vel pawh a siksawi nasa hle.