Box Office : "Taylor Swift: The Eras Tour" khum zo an awm lo

North America Box Office-ah "Taylor Swift: The Eras Tour" chuan ro a rel chhunzawm zel a, film chhuak thar rawn awm mah se khum zo an la awm lo.

Eras Tour movie hi tlangzarh karah box office lamah record siam khawpin a che ṭha nghal a, a kar hnihnaah pawh USD mtd 31 hmuh belh lehin North America-a a sum lak luh hi USD mtd 100 a tling der tawh. Kum 2009-a tihchhuah, 'Michael Jackson’s This Is It' tih lohah chuan concert film zinga sum la lut tam ber a ni tawh a, Michael Jackson pawh hi a khum chhoh rin a ni bawk.

Leonardo DiCaprio movie thar, Martin Scorsese nena an thawh dun ṭum rukna, 'Killers of the Flower Moon' chuan tlangzarh karah USD mtd 23 la lutin pahnihna a ni. He film hi Scorsese-a film siam tawh zingah tlangzarh kara sum la lut tam pathumna niin, 'Shutter Island' (2010) leh 'The Departed' (2006) te a pha lo thung. 'Flower Moon' hian international-ah erawh 'Eras Tour' movie aiin sum a la lut tam zawk a ni.

American supernatural horror film, "The Exorcist: Believer" chuan a kar thumnaah USD mtd 5.6 lak luh belh lehin, pathumnaah a awm. Kar thum chhungin domestic-ah USD mtd 54.2 a hmu chhuak tawh a, khawvel huapa a sum lak luh hi USD mtd 107.6 a tling tawh a ni.

No 4-ah kar liam taa tihchhuah, "PAW Patrol: The Mighty Movie" a awm a, USD mtd 4.4 a lak luh belh leh. Panganaah hian Tim Burton "The Nightmare Before Christmas", a kum 30-na puala an release nawn leh chu a rawn lang a, USD mtd 4.1 a hmu chhuak.