BRIT Awards-ah Adele a ropui ber

Nilaini zan khan Britain-a music lam inchawimawina an ngaihhlut ber, BRIT Awards sem a ni a, award mala an ngaihhlut ber dawng lo mah se, Adele chu mimala award dawng hnem ber a ni. BRIT Awards hi London-a O2 Arena-ah sem a ni.

Adele hian British Artist Video of the Year dawng lo mah se, award mal pali lai a hawn a, chung zingah chuan Best Album pawh a tel.

Kum 27 mi, British zaithiam hlawhtling Adele hian Best Album bakah hian British Female Solo Artist a dawng a, 'Hello' hla avangin British Single a dawng bawk a, British Album of the Year chu a album 25 avangin a dawng bawk. Hei bakah hian khawvel puma a hlawhtlinna nasa tak avangin Global Success award an hlan.

Adele hian award a dawnnaah hian Kesha a thlawp thu a sawi chhuak a, chu bakah chuan a label leh management chungah lawm thu a sawi bawk.

One Direction chu a langsar pawl an ni bawk a, Award mala an ngaihhlut berte zinga mi, Adele dawn theih loh, British Video of the Year an dawng. Justin Bieber chuan International Malse Solo Artist a dawng a, hetah hian Bieber chuan, "Hringnun hi zin kawng a ni a, chutah chuan mi tin hian din chang leh tluk chang kan nei a ni," tiin a hringnun hman chhoha chet chhiat leh chet ṭhat a neih chang a sawi lang.