Hollywood star-te'n President Biden lawmthu hrilh

Hollywood star leh executive eng emaw zat chuan US President Joe Biden chu lehkha thawnin, Israel-Hamas indona thleng meka a hma lak danah lawmthu an hrilh. Hemi rual hian Gaza Strip-a Hamas-te'n mi an la hren mekte chhuah an nih theihna tur chu ngaihtuah turin an ngen bawk.

President Biden hnena lawmthu hrilhtu zingah hian Gal Gadot, Amy Chumer, Adam Sandler, Bradley Cooper, Madonna, Courteney Cox, Chris Rock, Justin Timberlake, Tyler Perry, Will Ferrel, Zack Snyder leh Shawn Levy-te pawh an tel.

October 7-a Hamas-te'n Israel chhim lam an beih khan mi tam tak an kah hlum bakah, mi eng emaw zat manin an la hreng mek a, an mi man zinga mi pali chu tun hnaiah an chhuah a ni. Hamas-te'n an hren mekte chhuah vek an nih theihna tura hma lain, Hollywood leader-te chuan website, No Hostage Left Behind tih an siam a, hemi kawngah hian Israel mi lemchan thiam, Gal Gadot leh Amy Schumer-te chu a phusa pawlah an ṭang a ni. Hamas-te hian mi 220 vel an la hreng mek nia sawi a ni.

President Biden hnena lehkha an thawnah hian an thil duh chu thuhmun vek a ni tiin, Israel leh Palestinian mite chu inrem leh thlamuang taka an awm theih an duh tih an sawi. Hei bakah hian Hamas-te firfiakte taka an chetna lak aṭanga mipuite himna leh zalenna an duh thu leh, mi tam tak hren beh mekte chhuah zalen an nih thuai an duh thu an ziak bawk.