Liverpool tana vanneihna The Beatles

The Beatles band hi hmanlaia mi ni tawh mah se Liverpool khawpui tan chuan tunlaia mite aiin an la thawhhlawk a, Liverpool khawpui chuan he band avang hian tun thlengin sum tam tak a la lalut reng.

The Beatles avang hian Liverpool khua chuan kum tin £ mtd 82 zet a lal lalut ziah a, a chhui chiangtute chuan hei ai hian a la tam belh zel dawn niin an chhut. Liverpool khaw economy hian The Beatles hi a ṭhatpui hle a, he band avang hian Liverpool-ah mi 2,335 zet ten hna an neih phah tih Liverpool City Council chuan an tarlang.

The Beatles hi Liverpool khuaa indin an ni a, tunah hian Paul McCartney leh Ringo Starr te chauh an dam tawh a ni. Liverpool khaw enkawltute chuan The Beatles kaihhnawiha Liverpool khuain hlawkna a chan hi kum tin zaa 15 zeta ṭhang chho turah an beisei. Hetia a ṭhan zelna chhan lian tak pakhat chu tunhma aṭanga The Beatles an lo tlak nat tawhna USA leh Europe mai bakah, tunah hian China leh Brazil-ah fan an ngah sawt hle a, hei hian The Beatles avanga sumdawnnaah hlawkna a thlen belh zel a ni.

The Beatles-in rehearsal an lo neihna ṭhin, an jam room ṭhin, an lo chên tawhna ṭhinten ngaihhlut a hlawh a, kum tin mi nuai hnih vel zet chuan an tlawh ziah ṭhin a ni.